Dera e Qendrës për Azilkërkues në Magurë të Lipjanit hapet si me komandë nga një i ri, punonjës sigurimi aty. Objekti modern i ndërtuar me mjete të Komisionit Evropian ka kapacitete për të pranuar nga 60 deri në 100 azilkërkues. Aty mund të hyhet vetëm me leje të posaçme nga Ministria e Punëve të Brendshme. Drejtori Fitim Zariqi, tregon se në këtë qendër aktualisht kanë tetë persona, të cilët janë në pritje të azilit.
“Qendra për azilkërkues ka një kapacitet për akomodim të 60 deri maksimum 100 azilkërkuesve. Aktualisht në qendër kemi tetë persona që po kërkojnë azilin”, ka thënë ai. Një azilkërkues duke përfshirë të gjitha shpenzimet e akomodimit, pagesën e punëtorëve dhe derivatet dhe shpenzimet tjera që bëhen për të, sipas llogaritjeve të bëra në qendër, shtetit i kushton 21 euro në ditë.
