Nga Ben Andoni/
Deputetët kosovarë kanë treguar këtë fillimjavë se janë pjesë e një shoqërie krejt të sëmurë. Është dashur përgatitja e rivotimit për Gjykatën Kushtetuese, që t’i hapin njëri-tjetrit gjëra që turpërojnë dhe e ulin krejt Luftën e Kosovës dhe atdhedashurinë e shqiptarëve. Në njërën prej këtyre fjalimeve, është akuzuar një deputet i Vetëvendosjes se familja e vet e kishte pasur mike Millosheviçin, ashtu si e gjithë Vetëvendosja është damkosur me akuzën që se kanë ndihur fare Luftën e Kosovës. I akuzuari si mik i Millosheviçit e ka quajtur babanë e Thaçit (ky i fundit ka drejtuar kryqëzatën për votimin), si hajdut pulash, kurse Haradinaj i është qepur Thaçit duke i thënë hapur se kryeministri Mustafa do kënaqet me ty, kur të përfundosh në Gjykatë. Të tjerat s’po iu pëmendim…
E gjitha na ka kujtuar disi një mbledhje të famshme të politikanëve shqiptarë të para pak viteve, që e kanë degjeneruar njëri-tjetrin kaq shumë saqë partia e tyre nuk do ta mblidhte veten me vite e vite të tëra derisa sa do të ndahesh frikshëm.
Në të gjithë këtë tollovi dhe pak mungesë prestigji (të kujtojmë se Gjykata mund të votohej që në fillim, pa bërë këtë skenë papërgjegjshmërie që bënë kosovarët), nuk kemi dëgjuar as edhe njëherë të debatojnë politikanët kosovarë për energjinë e munguar dhe problemet bazike të jetës së kosovarit të thjeshtë. Pse kosovarët ikin për ditë e më shumë; pse të rinjtë s’kanë më shpresë; dhe pse vallë varfëria është kaq e madhe? Pse ata që në luftë u futën si të varfër, pas saj u bënë aq të pasur? Në fakt, për të gjitha këto, parlamenti kosovar ka vetëm monologë patetike, por asnjëherë qasje mbipartiake për të treguar se merret me gjëra thelbësore.
Ndryshe, votimi i Gjykatës Speciale, që për hir të së vërtetës do të krijohej dhe pa këtë votim të së hënës, i ka treguar bashkatdhetarët tanë si të papjekur politikisht dhe me mangësi të theksuara shtetndërtimi. Mu atë, që na kanë akuzuar në shekuj fqinjët jo aq dashamirë sllavë, kur thonë se shqiptarët s’kanë aftësi shtetformimi. Të paktën, këto debate dhe sharje, të na i kursenin sot, për hir të asaj që Kosova ka arritur dhe ëndrrës së madhe që kemi të gjithë se republika e tyre ka filluar të ecë me këmbët e saj dhe nuk lëngon rëndë, si u duk sot nga fjalët në jerm të shumicës së deputetëve patetikë të Kuvendit kosovar.
