Kosova nis përgatitjet për mbylljen e misionit të BE-së në Kosovë, EULEX.Ministria e Drejtësisë ka intensifikuar hapat për bartjen e kompetencave në aspektin e Mjekësisë Ligjore nga EULEX-i tek institucionet e Kosovës, raporton KTV.
Qeveria tashmë ka miratuar kërkesën e saj për themelimin e Institutit të Mjekësisë Ligjore.Në një intervistë për KTV-në, ministri Abelard Tahiri, është zotuar se do të përzgjedhin njerëzit adekuatë në krye të Institutit dhe se do të ketë prioritet punën për bartjen e kapaciteteve nga departamenti i Mjekësisë Ligjore te vendorët.
Organogrami parasheh rritjen e stafit të këtij Instituti për 10 persona, derisa do të vazhdojnë t’i shfrytëzojnë kapacitetet e EULEX-it tek ekspertët e antropologëve, deri në përfundimin e shkollimit të 2 ekspertëve të tillë, që po mundësohen nga Mbretëria e Bashkuar.
Ministri ka folur edhe për një koordinim mes Institutit të Mjekësisë Ligjore dhe Zyrës për të pagjeturit në Qeverinë e Kosovës, derisa ka theksuar se roli i kësaj të fundit është politik dhe assesi nuk mund të zëvendësojë rolin e Institutit në çështjen e zhvarrimeve.
Departamenti për Mjekësi Ligjore i EULEX-it aktualisht ishte i inkuadruar në kuadër të Institutit të Mjekësisë Ligjore, bazuar në ligjin për Mjekësi Ligjore. (b.an)
