Për analistin Baton Haxhiu formalizimi i marrëdhënieve mes Kosovës dhe Izraelit ishte shqetësues pasi u shoqërua me vendimin për të kaluar ambasadën në Jeruzalem, vendim që bie kundër me pjesën më të madhe të vendeve që e kanë mbështetur Prishtinën si BE-ja apo Turqia.
Duke folur gjatë emisionit Shock në Euronews Albania, përballë Andi Bushatit, Haxhiu e konsideroi “sfidë të madhe” situatën në të cilën është përfshirë Kosova dhe theksoi se kjo mund t’i hapë punë.
“Kur një vend është i pashpresë, kapet edhe prej një fije kashtë,” – ironizoi Baton Haxhiu duke e cilësuar situatën politike në Kosovë si ndër më të vështirën e mundshme.
Ai kujtoi se Kosova nuk njihet nga pesë vende të BE-së, nuk ka liberalizim të vizave, nuk figuron në organizata të rëndësishme ndërkombëtare dhe ndër këto ka vetëm marrëdhëniet me Shtetet e Bashkuara të Amerikës.
“Më keq se kaq s’ka ku shkon, na u desh dhe kjo, të prisheshim me BE-në dhe Turqinë [prej ambasadës në Jeruzalem],” – tha Haxhiu, i cili e ka konsideruar “as dhimbje të bukur” njohjen e pavarësisë nga Izraeli.
Haxhiu shprehu shqetësim për faktin se Kosova është e izoluar politikisht dhe me qasjen që ka ndërmarrë për të dërguar ambasadën në Jerusalem.
Ai ironizoi duke thënë se një veprim i tillë kërkon një ushtri të fortë. Duke analizuar më tej, analisti i njohur ngriti pyetjen se çfarë do të ndodhte nëse Turqia tërhiqet nga njohja e pavarësisë së Kosovës teksa drejtohet nga “një udhëheqës arrogant”.
I pyetur se përse Kosova duhet të vijojë të jetë në ndjekje të BE-së, pavarësisht se është bllokuar prej saj, Bushati paralelizoi me Serbinë ku kjo e fundit “ia shkel syrin” edhe shteteve të tjera. Ai theksoi se “nuk janë zgjedhjet mëkatare, por strategjia”./a.p
