Kandidati i Partisë Demokratike për Bashkinë e Tiranës, Halim Kosova, gjatë një takimi elektoral në Petrelë, ftoi sërish kryeministrin Edi Rama për të pirë një kafe. Edhe pse tha se Kryeministri mund të ketë probleme në partinë e tij nëse takohet me kandidatin demokrat, Kosova tha se e priste atë edhe pas zgjedhjeve të 21 qershorit.
“Dje kam pas takime shumë të mira dhe nuk ma merrni për keq, por i kam propozuar zotit Rama një kafe. Pse? Duhet të fillon bashkëpunimin pavarësisht nga cili do krah politik, për të biseduar. Do të ishte mirë para zgjedhjeve, por edhe pas zgjedhjeve se mund të ketë telashe nga partia e vet nëse më shohin me mua. Siç e kam shtri dorën e bashkëpunimit me çdo lloj force politike për të bërë më të mirën, po këtë lloj metode pse ta prish tani për ju? Jam i sigurt se nga bashkëpunimi nga cili do krah politik, fitojnë të gjithë banorët. Nga çdo lloj konflikti vetëm një e ha, populli, asnjëri nga ata që zgjidhen njëri me tjetrin”,deklaroi Kosova.
Në fjalën e tij, Kosova ka garantuar të pranishmit se do të punojë me devotshmëri nëse zgjidhet për të drejtuar Bashkinë e kryeqytetit. “Do të punoj ditë e natë, pas 21 qershorit keni për ta parë”, u ka thënë Kosova banorëve.
Nga ana e tyre, të pranishmit kanë vlerësuar figurën e doktor Kosovës si njeri, si dhe kanë shprehur bindjen se ai do të jetë në gjendje të menaxhojë më së miri Bashkinë e Tiranës.
“Do të shtrojmë rrugët dhe komunikimi mes banorëve do të jetë perfekt”, ka premtuar ndër të tjera kandidati demokrat. Gjatë bashkëbisedimit, doktor Kosova u është përgjigjur pyetjeve që banorët kanë pasur për të.
