Gjykata e Lartë me kërkesë të Prokurorisë së Përgjithshme në kuadër të hetimeve vendosi masën e sekuestros preventive mbi llogaritë bankare në shumën 50 mijë euro, në emër të Odhise Andrea, bashkëshorti i gjyqtares së Gjykatës së Lartë që u pezullua, Majlinda Andrea. Shuma e vendosur në sekuestro, 50 mijë euro është e njëjtë me atë që dyshohet se është marrë në formë korruptive.
Nga hetimi i Prokurorisë janë krijuar dyshime të arsyeshme se gjyqtarja Andrea ka marrë, nëpërmjet bashkëshortit të saj, shumën prej 50 mijë euro, nga disa persona, te cilët ishin palë në një proces gjyqësor civil në Gjykatën e Lartë. Gjyqtarja Majlinda Andrea është pezulluar, ndërkohë është shpallur në kërkim Odhise Andrea, i cili mbante detyrën e Këshilltarit në Komisionin e Sigurisë Kombëtare në Kuvendin e Shqipërisë.
Për personat e përfshirë në korrupsion gjykata vendosi pak ditë më parë që vetëm Eleni Lino të hetohet në masën arrest shtëpie, ndërsa Ilia Çabiri dhe Petraq Dashi u lanë në arrest me burg. Ilia Çabiri dhe Eleni Lino në cilësinë e përfituesit të pronës, përmes Petraq Dashi që ka shërbyer si sekser i dorëzuan 50 mijë Euro burrit Odhise Andreas për vendimin në favor të tyre.
Dosja, 50 mijë euro për 40 hektarë tokë
Nga hetimi rezulton se Ilia Çabiri nga Saranda, në cilësinë e përfaqësuesit të një familjeje ish-pronare, ka zhvilluar disa procese gjyqësore për njohjen e pronësisë mbi një sipërfaqe toke rreth 40 hektarë, në zonën e Butrintit. Deri në fillim të korrikut 2016, kjo çështje ishte në “fazën e studimit” në Gjykatën e Lartë.
I dyshuari Çabiri është angazhuar që procesi gjyqësor në Gjykatën e Lartë të përfundonte në favor të tij. Për këtë arsye, ai ka kontaktuar me të dyshuarin Petraq Dashi, i cili nga ana e tij kishte njohje dhe komunikim me shtetasin Odhise Andrea.
Ky i fundit është bashkëshorti i gjyqtares Majlinda Andrea, e cila ishte një prej anëtarëve të trupit gjykues të çështjes së të dyshuarit Çabiri në Gjykatën e Lartë.
Në vijim të kontakteve ndërmjet personave të përfshirë, i dyshuari Petraq Dashi nënshkruan një kontratë fiktive me të dyshuarit Ilia Çabiri dhe Eleni Lino, në bazë të të cilës ai deklaron se u huazon shumën prej 50 mijë euro.
Në fakt, këtë shumë, i dyshuari Petraq Dashi ia dorëzon bashkëshortit të gjyqtares së Gjykatës së Lartë, shtetasit Odhise Andrea, me qëllim dhënien e vendimit në favor të të dyshuarve Çabiri dhe Lino.
Një ditë pas dhënies së parave, konkretisht në datë 12 korrik 2016, trupa e Gjykatës së Lartë, pjesë e të cilës është edhe e dyshuara Majlinda Andrea, u shpreh me vendim në favor të shtetasve Ilia Çabiri dhe Eleni Lino.
ma.me
