Gjykata e Elbasanit ka dhënë masën e sigurisë për dekanin dhe pedagoget e Universitetit të Elbasanit, të cilët akuzohen për shpërdorim detyre dhe korrupsion. Mësohet se gjykata ka dhënë masën arrest me burg për dekanin Albert Riska. Po ashtu arrest me burg ka mbetur shefja e Departamentit të Gazetarisë, Elvira Lami e cila do qëndrojë për 60 ditë,
Ndërsa për pedagogen e jashtme Eriola Calja është vendosur masa e sigurisë arrest shtëpie. Një nga sekserët sipas gjykatës së Elbasanit, Petrit Kodra, do të qëndrojë në burg deri në një seancë tjetër. Ndërsa për dy sekserët e tjerë është dhënë masa e sigurisë arrest shtëpie. Mes atë arrestuarve ka qenë dhe një student, për të cilin gjykata ka dhënë masën e sigurisë arrest me burg.
Prokurori i çështjes ishte Ritvan Sukaj dhe gjyqtare Enkeleda Kapedani. Arrestimi i tyre u bë nga Strukturat e DVP. Elbasan në bashkëpunim me Prokurorinë pas një operacioni të realizuar me metoda speciale të hetimit që kishte zgjatur disa muaj. Grupi i tyre kryente aktivitet në fushën e korrupsionit dhe shpërdorimit të detyrës duke funksionuar në marrëdhënien dekan –pedagog-student dhe sekser në Universitetin “Aleksandër Xhuvani” në qytetin e Elbasanit.
Arrestimi i tyre u bë në të njënjtën kohë nga Specialistët e Sektorit për Hetimin e Krimit Ekonomik e Financiar në Drejtorinë Vendore të Policisë Elbasan në bashkëpunim me Prokurorinë e Rrethit Gjyqësor Elbasan .
Gjatë Operacionit “Dekani” përfunduan në pranga:
1- Albert Riska, 55 vjeç, banues në Elbasan, me detyrë Dekan i Fakultetit të Shkencave Humane në Universitetin “Aleksandër Xhuvani” , Elbasan.
2-Elvira Lumi, 54 vjeçe, banues në Elbasan, me detyrë Shefe e Departamentit të Gazetarisë në Fakultetin e Shkencave Humane në Universitetin “Aleksandër Xhuvani”,Elbasan.
3-Erjola Calja, 29 vjeçe, banues në Gostime Cërrik, pedagoge e jashtme në Fakultetin Ekonomik në Universitetin “Aleksandër Xhuvani”, Elbasan.
4-Petrit Kodra, 53 vjeç, banues në Elbasan, në rolin e sekserit.
5-Admirim Kala, 31 vjeç, banues në Tiranë, në rolin e sekserit.
6-Adem Ngjela, 51 vjeç, banues në Cërrik, në rolin e sekserit.
7-Marius Calja, 21 vjeç, banues në Gostime Cërrik, student.
Arrestimi i tyre u krye në zbatim të vendimit nr.315, datë 08.05.2018, të Gjykatës së Shkallës Parë Elbasan, e cila ka caktuar ndaj tyre masën e sigurisë “Arrest në burg”, për veprën penale të parashikuara nga neni 245/1/2 dhe 259, i Kodit Penal, “Ushtrimi i Ndikimit të Paligjshëm ndaj Personave që Ushtrojnë Funksione Publike” dhe “Korrupsioni Pasiv i Personave që Ushtrojnë Funksione Publike”.
Personat e arrestuar në bashkëpunim me njeri-tjetrin në kohë të ndryshme duke shpërdoruar funksionin publik kanë kërkuar dhe ushtruar ndikim të paligjshëm në rolin e sekserit dhe pedagogut në Universitetin “Aleksandër Xhuvani” Elbasan për marrjen e notave kaluese nga studentet gjatë sezoneve të provimeve përgjatë periudhës 2012-2018.
ma.me
