Korrupsioni në institucionet publike dhe në sistemin e drejtësisë mbetet një fenomen shqetësues, i shtrirë te funksionarët vendorë, administrativë, si edhe prokurorë, gjyqtarë dhe punonjës policie. Kështu shkruan SPAK në raportin vjetor të 2025, teksa nënvizon: Hetimet kanë evidentuar se procesi i prokurimit publik manipulohej në çdo fazë, nga përgatitja e dokumentacioni deri te ekzekutimi i kontratave. Korrupsioni në institucionet publike është i strukturuar dhe i planifikuar, duke përfshirë funksione të ndryshme administrative dhe publike. Vërehet një rënie e lehtë në hetimin e korrupsionit pasiv të funksionarëve të lartë shtetërorë/të zgjedhurve vendorë, por sidoqoftë në një rast është evidentuar lidhja me krimin e organizuar.
Struktura e Posaçme nënvizon se taskforca për zgjedhjet e përgjthshme të 2025, ka vëzhguar se kryetarët e fshatrave dhe kandidatët politikë, kërkonin ose ofronin përfitime monetare për votuesit, leje legalizimi të ndërtimeve informale, favore në vendin e punës dhe përfitime të tjera administrative në këmbim të mbështetjes elektorale.
SPAK: Në disa zona, zyrtarë të pushtetit vendor përdorën listat e zgjedhësve për të orientuar votuesit dhe për të ofruar përfitime direkte, duke evidentuar modele të koordinuara të ndikimit të paligjshëm në procesin zgjedhor. Hetimet treguan gjithashtu, bashkëpunim mes individëve të përfshirë për të shmangur kontrollin e organeve ligjzbatuese dhe për të mbrojtur strukturën korruptive nga ekspozimi.
Gjatë vitit 2025, u vu re aktiviteti i grupeve kriminale, që ka shfaqur një nivel të lartë organizimi, specializimi dhe shtrirjeje ndërkombëtare, veçanërisht në trafikimin e kokainës dhe drogave të tjera drejt tregjeve të BE-së.
SPAK: Një aspekt i veçantë i hetimeve ka qenë dokumentimi i lidhjes mes vrasjeve me pagesë dhe pastrimit të parave të përftuara nga aktiviteti i trafikut të drogës, që vinte kryesisht nga Amerika e Jugut drejt Evropës dhe Shqipërisë. Paratë përdoreshin për pagesa për ekzekutorët, blerje armësh,investime në sektorin a pasurive të patundshme dhe aktivitete private tregtare. Hetimet evidentuan gjithashtu, përdorimin e komunikimeve të koduara për planifikimin e ekzekutimeve, paralajmërimet për kontrolle dhe koordinimin logjistik.
Në 2025, Prokuroria e Posaçme ka shënuar një rritje të ndjeshme hetimeve proaktive, duke përfunduar 216 çështje. Vlera totale e aseteve të sekuestruara dhe konfiskuara është rreth 45.4 milionë euro.
