Korporata e Investimeve, Tabaku: Mungon transparenca. Ibrahimaj: Monitorohet çdo vit nga KLSH

Deputetja e Partisë Demokratike, Jorida Tabaku, gjatë fjalës së saj në interpelancën në Kuvend, ngriti shqetësimin për funksionimin e Korporatës së Investimeve, duke e cilësuar atë si një instrument të përdorur për privatizimin e shtetit dhe për përvetësimin e pronës publike.

“Korporata e Investimeve është një çështje që kërkon transparencë. Korrupsioni, kapja dhe privatizimi i shtetit janë të lidhura ngushtë me Korporatën e Investimeve, e cila është një nga mekanizmat privatë për të manipuluar dhe përvetësuar pronën publike. Kjo nuk ka lindur si një nevojë ekonomike apo e investitorëve, por si një justifikim për të krijuar një shtet privat brenda shtetit.”

Tabaku shtoi se gjashtë vite pas krijimit të korporatës është bërë e qartë se qeveria ka zgjedhur një ligj special për funksionimin e saj, duke i dhënë hapësirë pa garë, pa tendera publikë, pa transparencë dhe pa llogaridhënie.

 “Cili është inventari i pronave publike që i janë dhënë kësaj korporate? Cila është vlera e treguar e të gjitha pasurive publike që janë në dispozicion të saj? Korporata është përjashtuar nga ligjet publike dhe kjo është një problematikë madhore për shtetin.”

Nga ana tjetër, ministrja e Ekonomisë dhe Inovacionit, Delina Ibrahimaj, theksoi se Korporata e Investimeve Shqiptare është krijuar në vitin 2019 dhe funksionon si një model i ngjashëm me praktikat europiane, duke synuar shfrytëzimin më të mirë të aseteve publike për gjenerimin e të ardhurave për shtetin.

Ministrja nënvizoi se transparenca dhe kontrolli i vazhdueshëm nga institucionet e pavarura janë garanci që Korporata e Investimeve funksionon sipas ligjit dhe në interes të publikut.

“Korporata e Investimeve u krijua në vitin 2019 dhe ka mbi gjashtë vite që është në funksionim. Qëllimi i saj është të jetë në shërbim të sipërmarrësve dhe të krijojë një model që tashmë funksionon në Europë, ku të gjitha asetet publike shfrytëzohen në mënyrë më të mirë dhe më të qëndrueshme për gjenerimin e të ardhurave për shtetin. Korporata është subjekt i monitorimit nga Kontrolli i Lartë i Shtetit dhe në veprimtarinë e saj ka pasur kontroll të performancës çdo vit që nga krijimi. Detyrat e lëna nga KLSH janë adresuar dhe realizuar me përkushtim”, tha Ibrahimaj.