Ministria kineze e Financave lançoi një kornizë për obligacionet e gjelbra sovrane, duke i hapur rrugën vendit për të emetuar bono sovrane të gjelbra “offshore” dhe kapital global për të investuar në zhvillimin e gjelbër, shkruan “Xinhua”.
Fondet e mbledhura nga bonot e gjelbra në kuadër të kornizës do të ndahen për projektet e gjelbra të përfshira në buxhetin qendror fiskal.
Fondet pritet të kontribuojnë në arritjen e qëllimeve mjedisore, si zbutja dhe përshtatja e ndryshimeve klimaterike, mbrojtja e burimeve natyrore, kontrolli i ndotjes dhe ruajtja e biodiversitetit.
Sipas ministrisë, kjo nismë synon të diversifikojë gamën e produkteve të bonove të gjelbra me cilësi të lartë në tregun global dhe të tërheqë kapital ndërkombëtar për të mbështetur zhvillimin vendas të gjelbër dhe me karbon të ulët.
