Koreja e Veriut ka vendosur të përshpejtojë zhvillimin e arsenalit të saj bërthamor, tha udhëheqësi Kim Jong Un teksa mbikëqyrte një paradë të madhe ushtarake.
Në këtë paradë, u demonstruan raketa balistike ndërkontinentale (ICBM) dhe armë të tjera, raporton noa.al duke cituar agjencinë shtetërore të lajmeve KCNA.
Parada u zhvillua të hënën në mbrëmje gjatë festimeve për përvjetorin e themelimit të forcave të armatosura të Koresë së Veriut. Ajo vjen pasi Pheniani ka rritur testet e armëve dhe demonstrimin e fuqisë ushtarake.
Por ky tregim force vjen ndërsa janë bllokuar bisedimet për denuklearizimin me Shtetet e Bashkuara.
Zyrtarët e SHBA dhe Koresë së Jugut thonë se ka shenja të ndërtimeve të reja në të vetmen zonë që dihet zyrtarisht se Koreja e Veriut bën testime bërthamore. Këto zhvillime vijnë ndërsa kjo zonë e testimit bërthamor të Koresë së Veriut, është mbyllur zyrtarisht që nga viti 2018.
Por tani është rritur shumë dyshimi se Pheniani mund të përgatitet të rifillojë testimin e armëve bërthamore.
“Forca bërthamore e Republikës duhet të jetë e gatshme të ushtrojë misionin e saj të përgjegjshëm dhe parandalimin unik në çdo kohë,” tha Kim gjatë fjalimit në paradë.
Misioni themelor i forcës bërthamore të Veriut është të pengojë luftën, por ky mund të mos jetë i vetmi përdorim, shtoi ai.
“Nëse ndonjë forcë kërkon të ndërhyjë në interesat themelore të kombit tonë, forcat tona bërthamore do të detyrohen të kryejnë në mënyrë të menjëhershme misionin e tyre”, tha Kim.
Parada nxori ICBM-në më të madhe të njohur të Koresë së Veriut, Hwasong-17, raketa masive që u testua për herë të parë muajin e kaluar.
Gazeta Rodong Sinmun e Koresë së Veriut publikoi foto që tregonin Hwasong-17, si dhe raketa hipersonike dhe raketa balistike të lëshuara nga nëndetëse (SLBM), midis armëve të tjera në kamionë dhe automjete lëshuese që ishin rrethuar nga turma vëzhguesish dhe pjesëmarrësish që valëvitnin flamujt.
Në paradë u shfaqën shumë lloje armësh konvencionale si artileri, raketahedhës dhe tanke prototip. Ndërsa dhjetëra mijëra trupa ushtarake thërrisnin “jetë të gjatë” për Kim Jong Un.
Programet e raketave balistike dhe armëve bërthamore të Koresë së Veriut janë të ndaluara nga rezolutat e Këshillit të Sigurimit të Kombeve të Bashkuara, të cilat kanë vendosur sanksione ndaj vendit.
/a.r
