Koreja e Veriut ka lëshuar sot një raketë balistike drejt detit mes Gadishullit Korean dhe Japonisë, duke bërë që Japonia të urdhërojë banorët në një ishull që të futen në vendstrehime për t’u mbrojtur.
Shtabi i përgjithshëm i Koresë së Jugut tha se raketa e Koresë së Veriut lëvizi drejt ujërave midis Gadishullit Korean dhe Japonisë, por nuk dha detaje të mëtejshme, sesa larg shkoi dhe se çfarë lloji rakete lëshoi Koreja e Veriut. Japonia tha se raketa ra në det, por nuk dha detaje të menjëhershme.
Nisja më e fundit në serinë e provave me raketa të Koresës së Veriut këtë vit, erdhi disa ditë pasi udhëheqësi i saj Kim Jong Un u zotua të rrisë arsenalin e tij bërthamor në mënyra më “praktike dhe ofensive”.
Ministri japonez i Mbrojtjes, Yasukazu Hamada, u tha gazetarëve se predha, “ndoshta një raketë balistike e klasit ICBM (raketë balistike ndërkontinentale)” nuk duket të ketë rënë brenda Zonës Ekskluzive Ekonomike të Japonisë.
Sipas ushtrisë së Koresë së Jugut, mund të ketë qenë një raketë me lëndë djegëse të ngurtë, një teknologji që ka qenë prej kohësh një objektiv i programeve ushtarake të Kim Jong Un.
“Duket se Koreja e Veriut ka lëshuar një lloj të ri rakete balistike, ndoshta lëndë djegëse të ngurtë”, tha Shtabi i Përgjithshëm në Seul.
Shtetet e Bashkuara “dënuan fuqishëm” Korenë e Veriut për atë që Shtëpia e Bardhë e përshkroi si testimin e një “rakete balistike me rreze të gjatë”, duke akuzuar Phenianin për ndezjen e tensioneve rajonale.
“Presidenti (Joe Biden) dhe ekipi i tij i sigurisë kombëtare po vlerësojnë situatën në koordinim të ngushtë me aleatët tanë,” tha zëdhënësja e Këshillit të Sigurisë Kombëtare Adrienne Ëatson. Nisja ishte “një shkelje e hapur e rezolutave të shumta të Këshillit të Sigurimit të Kombeve të Bashkuara dhe kërcënon të destabilizojë situatën e sigurisë në rajon.”
/a.r
