Gjykata e Korçës ka dhënë masën e sigurisë për dy personat e arrestuar pas aksidentit në punë me pasojë vdekjen të punëtorit Elvis Josifi.
Dy të ndaluarit janë lënë të lirë, pasi Gjykata ka vendosur detyrim paraqitje ndaj përgjegjësit teknik të firmës së ndërtimit, Flamur Palla, 67 vjeç dhe manovratorin e firmës, Aurel Zyma, 41 vjeç.
Ata akuzohen për veprën penale “Shkelje e rregullave të mbrojtjes në punë”.
Policia njoftoi se gjatë procesit të hedhjes së betonit në objekt, është dëmtuar një segment metalik i presës, i cili ka goditur në kokë duke i shkaktuar vdekjen e punëtorit Elvis Josifi, 36 vjeç, si dhe ka dëmtuar 59-vjeçarin P.F.
Viktima Elvis Josifi punonte si i nënkontraktuar nga një firmë, e cila po ndërton objektin ku ndodhi ngjarja.
Viktima mësohet se ishte i siguruar dhe familja do të përfitojë nga sigurimi i jetës një vlerë prej 10 mijë lekë të rinj në muaj. Sipas deklarimeve te personave të shoqëruar në polici, 36-vjeçarit i ra mbi kokë segmenti metalik që peshonte rreth 5 ton, duke i çarë kaskën mbrojtëse, çfarë solli vdekjen e menjëhershme.
/a.r
