“Festivali i Dritave” mbushi edhe këtë vit me vizitorë të shumtë qytetin juglindor të Korçës.
Dekori dhe atmosfera e festave të fundvitit e ka shndërruar Korçën në qytetin e festave. Ceremonitë nisën me ndezjen e dritave që zbukurojnë qytetin përgjatë gjithë muajit dhjetor.
Një super koncert, pista e patinazhit, këndi i fotografisë dhe shumë surpriza të tjera të ftojnë në Korçë, në muajin më të bukur të vitit.
Qindra qytetarë e vizitorë iu bashkuan ceremonisë së mbajtur tek Pazari i Vjetër i Korçës.
Sipas kryetarit të bashkisë së Korçës, Sotiraq Filo, “kjo është një atmosferë që i shërben jo vetëm qytetit, por edhe vizitorëve që nga viti në vit po vijnë dhe po kalojnë festat në Korçë”.
Shtimi i ndjeshëm i numrit të vizitorëve vendas dhe të huaj ka bërë që bashkia e Korçës të organizojë aktivitete të cilat do të vazhdojnë përgjatë gjithë dhjetorit./ATSH/b.d
