Nënshkrimi i kontratave për bizneset që do të mund të marrin plazhet me qira do të ndjekë rregullat e reja të miratuara në ndryshimet që bëri qeveria në rregullore së fundmi.
Duke parashtruar një sërë të rejash, të lakuara edhe më herët, për kushtet që duhet të plotësojnë subjektet, si dhe vendosjen e një tavani për çmimet, duket se ka një grup që qëndron mbi pjesën tjetër.
Bëhet fjalë për investitorët strategjikë. Këta të fundit kanë përparësi mbi plazhet në raport me grupin tjetër.
Rregullorja për stacionet e plazhit, në pikën 2 të nenit shtatë, përcakton: “Në rastin e kërkesave të projekteve me potencial strategjik, sipas përcaktimeve të ligjit nr. 55/2015, ‘Për investimet strategjike në Republikën e Shqipërisë’, të ndryshuar, apo kërkesave të investitorëve në zonat me përparësi zhvillimin e turizmit, kontrata për përdorimin e hapësirës së plazhit lidhet sipas akteve ligjore dhe nënligjore përkatëse”.
Në rregulloren e rishikuar kjo pikë vijon me një shtesë: “dhe ka përparësi mbi kontratat e plazhit të lidhura në atë zonë. Në çdo rast, gëzimi i përdorimit të bregut të detit si stacion plazhi nga investitori strategjik fillon pas vënies në funksion të strukturës akomoduese turistike”.
Kjo do të thotë se investitorët strategjikë janë të parët që mund të lidhin kontratën për përdorimin e plazhit dhe kjo nis në momentin që vënë në funksion strukturën turistike.
Ndërkohë, rregullorja ndryshon dispozitat kalimtare në pikën 3 dhe 4. Pra, për këto plazhe, aty ku nuk ka strukturë akomodimi, subjekti i interesuar për të marrë një stacion plazhi duhet të ketë një strukturë shërbimi.
“Përjashtimisht, për Bashkinë Fier, Bashkinë Divjakë, Bashkinë Pogradec, për plazhin Zvërnec, Plazhin e Vjetër, Bashkia Vlorë, plazhet Spille, Vilë-Bashtovë, Bashkia Rrogozhinë, plazhet Shetaj, plazhin e Gjirit të Lalzit, plazhin Hamallaj, plazhin e Katundit të Ri, plazhin Porto-Romano 1, plazhin Currila 1, plazhin Currila 2, plazhin Currila 3, plazhin Currila 4, plazhin Currila 5, Bashkia Durrës, plazhet Borsh, Llaman, plazhin Lukovë 2, plazhin Maraçi, Bashkia Himarë, plazhin e Rrjollit, Bashkia Shkodër, në stacionet e plazhit që nuk kanë struktura akomoduese pranë apo në afërsi të hapësirës së plazhit, nuk zbatohet kriteri i parashikuar në shkronjën ‘b’, të pikës 3, të nenit 7, dhe subjekti, përveç kritereve të parashikuara në shkronjat ‘c’ dhe ‘ç’, të pikës 3, të nenit 7, duhet të plotësojë kriteret e mëposhtme”, thuhet në pikën 3 të rishikuar./Monitor
