Klubi i Flamurtarit ka reaguar me anë të një deklarate për shtyp ndaj ish-kryetarit të Bashkisë Vlorë, Shpëtim Gjikës, duke publikuar në faqen zyrtare në Facebook fotot e kontratës së ish-trajnerit Ernest Gjoka si dhe vërtetimin e pagesave të kryera ndaj tij sipas Drejtorisë së Tatimeve Vlorë.
Në të njëjtën kohë vlonjatët i kërkojnë Federatës të marrë parasysh që ka njohur si trajnerin Ernest Gjokën mbi një kontratë të pavlefshme, ndaj në respekt të rregullores të reflektohet mbi detyrimet e Flamurtarit.
Deklarata e plotë e Flamurtarit
“Dëshirojmë të sqarojmë opinionin publik për sa i përket cështjes Gjoka.
Sic shikohet dhe nga kontrata e publikuar nga ana jonë, kjo kontrateë është firmosur nga ish Kryetari Bashkisë Vlorë , z. Shpëtim Gjika i cili nuk ka pasur asnjë tager ligjor për të përfaqësuar Klubin Flamurtari.
Në këtë rast me të drejtë Bashkia Vlorë nuk e njeh si kontratë dhe detyrimisht nuk njeh as detyrimet financiare të saj.
Në të njëjtën kohë një gabim është bërë dhe nga FSHF pasi ka licensuar zotin Gjoka si trajner për periudhën në fjalë duke marrë për bazë këtë kontratë të firmosur nga persona të paautorizuar.
Kërkojmë nga ana e FSHF që në respekt të rregullores dhe ligjit të marrë parasysh këtë fakt dhe të reflektoj në vendimmarrje pasi Flamurtari nuk ka asnjë pergjegjësi financiare.
Sqarojmë se zoti Gjoka dhe Flamurtari sh.a po ti referohemi Drejtorisë së Tatimeve Vlorë rezultojnë se kanë pasur një akord financiar.”
Panorama/d.i.
