Konfirmohet në detyrë prokurori i Krimeve të Rënda Olsjan Çela, kandidat për pozicionin e Prokurorit të Përgjithshëm të Republikës së Shqipërisë.
Pas senacës dëgjimore, Komisioni i Pavarur i Kualifikimit ka dhënë vendimin këtë të martë duke e konfirmuar në detyrë Çelën.
“Trupi gjykues pasi shqyrtoi të gjithë dokumentacionin e dërguar nga institucionet e verifikimit zhvilloi një procedurë të thellë hetimi administrativ, dëgjoi subjektin e rivlerësimit në seancën e datën 19 korrik 2019 në respektim të të drejtave të tij për një proces të rregullt ligjor e konsideron të përfunduar seancën dëgjimore. Në konkluzion të këtij procesi rivlerësimi, trupi gjykues i përbërë nga unë Lulzim Hamitaj, kryesues, Olsi Komici, relator dhe Brunilda Berkteshi anëtare, vendosi konfirmimin në detyrë të subjektit të rivlerësimit, Olsian Çelën,”-tha kryesuesi i senacës Hamitaj.
Vendimi u prit me duartrokitje nga kolegët e Çelës.
I shortuar me përparësi për shkak të kandidimit Çela, u verifikua për të tre kriteret pasurinë, integritetin dhe aftësisë profesionale.
Ndërkohë i pranishëm në seancë ishte edhe vetë Olsjan Çela si dhe vëzhguesit ndërkombëtarë.
Prokurori doli para komisionit të vettingut më 19 korrik.
Kandidat për prokuror të Përgjithshëm janë 4, bashkë me Çelën. Arta Marku, prokurore e përkohshme, por kërkon një mandat të plotë kushtetues. Në garë janë edhe Fatjona Memçaj, prokurore e Apelit, dhe avokati Lulzim Allushaj.
Olsian Çela është rivali kryesor i Arta Markut në garën për Prokuror të Përgjithshëm.
Vendimi i parë që pritet të marrë Këshilli i Lartë i Prokurorisë pas konstituimit do të jetë zgjedhja e Prokurorit të Përgjithshëm me mandat të plotë 7-vjeçar.
Pas zgjedhjes se KLP-së, është kjo e fundit që i liston kandidatët. Kryeprokurori zgjidhet me 3/5 me një mandat 7 vjeçar, pa të drejtë riemërimi. Nëse Kuvendi nuk e zgjedh Prokurorin e Përgjithshëm brenda 30 ditëve, atëherë detyrën e merr kandidati i renditur i pari në listë.
g.kosovari
