Një konferencë dyditore për rindërtimin e Ukrainës pas luftës u hap në Poloni. Liderët e Polonisë, Bullgarisë, Estonisë, Finlandës, Letonisë, Lituanisë, Rumanisë dhe Suedisë, së bashku me presidenten e Komisionit Evropian, Ursula von der Leyen, dhe presidentin e Këshillit Evropian, António Costa, u takuan në qytetin portual veriperëndimor të Gdanskut, për t’u bërë thirrje kompanive dhe vendeve të investojnë kapital në Ukrainë pas përfundimit të konfliktit.
Kryeministri polak Donald Tusk deklaroi në nisje të konfërencës se partenrët besojnë tek forca e Ukrainës për ti bërë ballë rusisë, teksa solli shëmbullin e nisjes së luftës së dytë botërore pikërisht në Gdansk dhe historisë së rindërtimit të atij qyteti.
“Ishte pikërisht këtu, në Gdansk, që Evropa përjetoi një nga ngjarjet më të trishta të historisë së saj, me të shtënat e para të Luftës së Dytë Botërore. Qyteti më pas u rindërtua jo vetëm në aspektin arkitektonik, por edhe në shpirt. Dhe ky do të jetë i njëjti fat edhe për Ukrainën. Në Bashkimin Evropian të gjithë besojmë se ky vend mund t’i rezistojë pushtimit rus”, tha Tusk.
Presidentja e KE Von Der Leyen, njoftoi lëvrimin e një pjese të kredisë që BE miratoi për UKrainën e që do të shërbejë për industrinë ukrainase të dronëve.
“Sot po transferojmë këstin e parë të kësaj kredie, mbi 3 miliardë euro ndihmë makrofinanciare. Ky është solidaritet në veprim që tregon se mbështetja e Evropës për Ukrainën është e destinuar të zgjasë. Ne vazhdojmë t’u bëjmë thirrje të gjithë partnerëve tanë që të ruajnë mbështetjen e tyre, sepse një Ukrainë e fortë dhe e pavarur është në interesin e të gjithëve. Ambicia jonë nuk është vetëm të ndihmojmë Ukrainën të rezistojë, por ta ndihmojmë atë të rritet dhe të prosperojë si një vend i lirë dhe evropian”, tha ajo.
Von Der Leyen nënvizoi edhe hapjen e grupkapitullit të parë me Ukrainën në kuadër të negociatave për anëtarësim, si një provë se mbështetja e BE ndaj Kievit është e vazhdueshme. Volodymyr Zelenskyy, anulloi pjesëmarrjen për shkak të krizës diplomatike të hapur me Varshavën dhe dërgoi si kryesuese të delegacionit kryeministren Yulia Svyrydenko.
Polonia dhe ukraina kundërshtohen pasi kjo e fundit emërtoi një njësi ushtarake me emrin Ushtria Kryengritëse e Ukrainës që konsiderohet simbol i rezistencës kundër sundimit sovjetik dhe i luftës për pavarësi por që në varshavë e shohin si përgjegjëse për vrasjen e shumë polakëve në të kaluarën.
Sa i takon rindërtimit, një raport i përbashkët i Ukrainës, Banka Botërore, Kombet e Bashkuara dhe Bashkimi Evropian, i publikuar në shkurt, vlerësoi se rindërtimi pas luftës do të kushtojë rreth 588 miliardë dollarë. Megjithatë, pa përparim në bisedimet e ndërmjetësuara nga Shtetet e Bashkuara për t’i dhënë fund luftimeve, bindja e investitorëve për të mbështetur rimëkëmbjen e Kievit është treguar e vështirë.
