Dje, maxhoranca ka përfshirë në axhendën e Kuvendit për votim në seancën e 22 shtatorit të gjashtë projektligjet e reformës, por ky fakt është kundërshtuar nga pakica. Sipas burimeve nga opozita, 6 projektligjet e reformës nuk mund të votohen në seancën e 22 shtatorit pasi në këtë mënyrë shkelet Rregullorja e Kuvendit.
Të gjashta nismat ligjore kërkojnë shumicë të cilësuar votash, pra 84 vota, dhe si të tilla nuk mund të futen me procedurë të përshpejtuar në punimet e Kuvendit. Kalendari i punimeve dhe programi i punës për tri javët e ardhshme ka kaluar pa konsensus në Konferencën e Kryetarëve, çka detyroi kryetarin e Parlamentit ta miratojë atë gjatë nisjes së seancës.
“Programi dhe kalendari nuk u miratuan sepse nuk patën konsensus të plotë, pasi patëm abstenim nga ana e opozitës, kështu që do të miratohen me votim”, u shpreh Meta.
Seanca e djeshme e Parlamentit nuk është shoqëruar me diskutime politike. Asnjë prej deputetëve të opozitës nuk ka mbajtur fjalime për të shprehur qëndrime politike Kuvend për kalendarin e punimeve trijavore. Këtë pakënaqësi opozita e ka shprehur me votën abstenim, në mbledhjen e Konferencës së Kryetarëve.
AXHENDA
Në kalendarin e punimeve të 22 shtatorit është parashikuar të zhvillohet seanca e veçantë, në të cilën pritet të kalojnë në bllok të 6 projektligjet e paketës së reformës. Edhe pse nismat janë ende në proces shqyrtimi në Komisionin e Posaçëm të Reformës në Drejtësi, në kalendarin e punimeve trijavore rezulton se ato janë depozituar që më datë 29 qershor të vitit 2016.
Në rast se opozita nuk do të japë konsensus, atëherë maxhoranca pritet ta miratojë javën e tretë të shtatorit, me 84 vota, projektligjin “Për organizimin dhe funksionimin e Prokurorisë”; projektligjin “Për organizimin e qeverisjes së sistemit të drejtësisë”; projektligjin “Për statusin e gjyqtarëve dhe prokurorëve”; projektligjin “Për organizimin e pushtetit gjyqësor”; projektligjin “për organizmin e Gjykatës Kushtetuese” dhe projektligjin “Për organizimin dhe funksionimin e institucioneve në luftën kundër korrupsionit dhe krimit të organizuar (SPAK)”.
ma.me
