Vetëm 14 anije kaluan Ngushticën e Hormuzit të martën, tha firma e inteligjencës detare Kpler, duke shënuar një rritje të lehtë nga fundjava, një ditë pasi presidenti i SHBA-së Donald Trump pretendoi se rruga ujore është “e hapur”.
Pavarësisht pretendimeve të përsëritura të Trump se SHBA-të kontrollojnë ngushticën, shumica e anijeve përdorën rrugën e miratuar nga Irani, të cilën SHBA-të i kanë paralajmëruar anijet të mos e ndjekin.
“Ndërsa trafiku përmes ngushticës është rritur pak, këto vëllime më të larta nuk janë përkthyer në normalizim”, shtoi Kpler.
Njëmbëdhjetë nga 14 anijet ndoqën rrugën e miratuar nga Irani dhe asnjëra nuk përdori rrugën tradicionale përmes qendrës së ngushticës që ndoqën shumica e anijeve para luftës, tha Kpler.
Trump theksoi dje se SHBA-të kanë fituar kontroll mbi Ngushticën e Hormuzit.
“Ata nuk kanë kontroll. Ne kemi kontroll të plotë. Ne e zotërojmë atë, dhe në një moment, ndoshta ata do të bëjnë diçka, dhe pastaj do të shkatërrohen”, u tha Trump gazetarëve.
“Tani për tani, ne jemi në një pozicion shumë të mirë”, shtoi ai.
Por trafiku detar nuk është rritur ndjeshëm dhe mbetet shumë më poshtë se afërsisht 120 anijet që lundronin në këtë rrugë ujore çdo ditë para luftës.
