Sikurse ishte paralajmëruar, Komiteti Teknik i Ekspertëve është mbledhur sot për të diskutuar shtrëngimin e masave të pandemisë.
Për shkak të rritjes së ndjeshme të infektimeve Komiteti ka vendosur për një skenar të ri të lëvizjes së qytetarëve.
“Jemi në gjë situatë ku me gjasë prej varianteve të reja të Covid kemi shtim të infektimeve. Gjithashtu kushtet atmosferike e bëjnë më të pafavorshme situatën. Nga ana tjetër është ulur mosha e të infektuarve. Komiteti Teknik i Ekspertëve ka vlerësuar situatën ditore dhe mbi bazën e një analize bazuar edhe në eksperiencat e fituara gjatë këtyre muajve, vendosi:
– Ndalimi i qarkullimit të lëvizjes për qytetarët nga ora 20:00 e mbrëmjes – 6:00 të mëngjesit, me përjashtim të emergjencave shëndetësore dhe për arsye pune (në këtë rast është e domosdoshme leja nëpërmjet aplikimit tek e-Albania) për një afat 14 ditor, duke filluar nga dita e enjte, datë 11 Shkurt – 25 Shkurt.
– Ndalimi i aktiviteteve të bareve, restoranteve, klubeve, nga ora 20:00 e mbrëmjes – 06:00 të mëngjesit (me përjashtim të shërbimit delivery), duke filluar nga dita e enjte, datë 11 Shkurt – 25 Shkurt.
– Nisur nga rritja e rasteve të infektimeve të reja në grupmoshën 15-24 vjeç, shkollat e mesme do të aplikojnë skenarin e tretë, pra atë online ne zonat e riskut të lartë, ku përfshihen bashkitë: Tiranë, Fier, Vlorë, Berat, Durrës, Gjirokastër, Lezhë, Lushnje, Pogradec dhe Kamëz, për periudhën 11 shkurt – 26 shkurt.
– Sezoni i provimeve për universitetin do të zgjatet, për të siguruar kombinimin e provimeve online dhe në auditor, për lëndët që kërkojnë prezencë, sipas vlerësimit të MASR, duke zbatuar rreptësisht protokollet AntiCovid.” – tha ministrja Manastirliu.
Shtrëngimin e masave e njoftoi një ditë më parë edhe kryeministri Edi Rama. Ai foli edhe për një ashpërsim të kontrolleve për zbatimin e rregullave të vëna.
/a.r
