Kuvendi i lë tre muaj afat komisionit hetimor për shkarkimin e Ilir Metës. Pas votimit për ngritjen e komisionit dhe shtimin me dy anëtarë të tij nga 9 në 11, Kuvendi do të votojë afatin 3 mujor për shkarkimin. Kjo do të thotë që brenda tre muaj, ky komision duhet të dorëzojë raportin përfundimtar, që më pas do përcillet për në Gjykatën Kushtetuese.
Sipas komisionit hetimor, objekt hetimi do të jenë të gjitha shkeljet e presidentit, që sipas shumicës janë jo pak, por plot 9 të tilla. Por a është i mjaftueshëm ky afat dhe a mundet që deri atëherë të ngrihet Gjykata Kushtetuese dhe të ketë një vendim final.
Gjithsesi, për maxhorancën të gjitha janë të mundshme.. “Në fakt me të drejtë në 2017-ën kanë dhënë një vendim të tillë, ku ia referon konfliktet për të dekretet për datat e zgjedhjeve Kolegjit Zgjedhor, apo Gjykatës Administrative, duke iu referuar nenit 131 apo 134 të Kushtetutës”, thanë përfaqësues të maxhorancës.
E pyetur se nëse Gjykata Kushtetuese do të ishte funksionale, a do të ishte paditur akti i Presidentit në këtë Gjykatë prej PS, deputetët thanë “Një akt administrativ i pavlefshëm, përsa kohë nuk prodhon asnjë pasojë nuk ka arsye përse të goditet. Si KQZ, KZAZ, ashtu edhe Gjykatat e kanë konstatuar kryesisht pavlefshmërinë absolute të një akti administrativ, sepse ka një praktikë të konsoliduar. Ne si subjekt do ta kishim ankimuar, nëse ky akt do të kishte sjellë pasoja reale për të penguar zgjedhësit për votuar”.
K U V E N D I
I REPUBLIKËS SË SHQIPËRISË
V E N D O S I:
1. Ngritjen e Komisionit Hetimor të Kuvendit për shqyrtimin e kërkesës së një grupi
deputetësh, për të kontrolluar ligjshmërinë e veprimeve të kryera nga ana e Presidentit të
Republikës së Shqipërisë në kuadër të ushtrimit të kompetencave të tij lidhur me zhvillimin e
zgjedhjeve për organet e qeverisjes vendore.
2. Ky hetim ka për qëllim njohjen si dhe verifikimin e mënyrës së ushtrimit të
kompetencave nga ana e Presidentit të Republikës së Shqipërisë lidhur me zhvillimin e
zgjedhjeve për organet e qeverisjes vendore në përputhje me parimet kushtetuese si parimi i
ndarjes dhe balancimit të pushteteve, shtetit të së drejtës dhe demokracisë funksionale, si
dhe nxjerrjen e përgjegjësisë konkrete institucionale.
3. Objekt i punës së komisionit hetimor është:
a) Verifikimi i procedurave të ndjekura nga ana e Presidentit të Republikës së
Shqipërisë gjatë ushtrimit të kompetencave të lidhur me zhvillimin e zgjedhjeve për organet e
qeverisjes vendore;
b) Hartimi i akteve si dhe efektet e tyre juridike në raport me kompetencat e
Presidentit të Republikës së Shqipërisë;
c) Pasojat e këtyre akteve në raport me institucionet e tjera të Republikës së
Shqipërisë si, Kuvendi, Këshilli i Ministrave Komisioni Qendror i Zgjedhjeve, apo Gjykatat.
ç) Sjellja dhe qëndrime të caktuara të Presidentit të Republikës në raport me rolin dhe
pozitën e tij kushtetuese.
4. Komisioni hetimor parlamentar përbehet nga 11 deputetë, si më poshtë:
1.________________________________________ Kryetar
2.________________________________________ Zëvendëskryetar
3.________________________________________ Anëtar
4.________________________________________ Anëtar
5_________________________________________ Anëtar
6.________________________________________ Anëtar
7.________________________________________ Anëtar
8.________________________________________ Anëtar
9.________________________________________ Anëtar
10._______________________________________ Anëtar
11._______________________________________ Anëtar
5. Komisioni hetimor, i ngritur sipas këtij vendimi, bashkë me raportin përfundimtar i
paraqet Kuvendit në mënyrë të arsyetuar nëse ekzistojnë shkaqet për shkarkimin e
Presidentit të Republikës.
6. Komisioni e ushtron veprimtarinë e tij për një afat 3-mujor nga hyrja në fuqi e këtij
vendimi.
7.Ngarkohen Kryetari i Kuvendit që menjëherë të caktojë mjediset dhe mjetet e punës
së komisionit, si dhe personelin e nevojshëm, duke vënë në dispozicion edhe ekspertë juriste.
8.Ngarkohet Sekretari i Përgjithshëm i Kuvendit që të marrë masa për zbatimin e
vendimit të Kuvendit dhe të urdhrave të Kryetarit të Kuvendit, për mbarëvajtjen e punës së
komisionit, si dhe krijimin e kushteve të nevojshme logjistike për veprimtarinë normale te tij.
Ky vendim hyn në fuqi menjëherë.
Miratuar më______/______/2019
KRYETARI
GRAMOZ RUÇI
