Kryetari i Partisë Demokratike, Sali Berisha, gjatë një bashkëbisedimi online me qytetarët, sot 15 nëntor, u pyet në lidhje me reformën zgjedhore. Ai theksoi se nëse opozita nuk do të merrte pjesë në komisionin e posaçëm për hartimin e një reforme të re zgjedhore do të humbte aleatët ndërkombëtarë të zgjedhjeve.
“Zgjedhjet janë sa kombëtare aq dhe ndërkombëtare. Nëse ne heqim dorë siç sugjeroni ju apo dikush tjetër, ne humbasim aleatët ndërkombëtare të zgjedhjeve të lira. Ne jemi për zbatimin e rekomandimeve të tyre, por ne u themi shqiptarëve që miqve tanë se me Edi Ramën nuk ka kurrë zgjedhje të lira. Nëse ne do të refuzonim komisionin zgjedhor dhe adresimin e rekomandimeve të OSBE-ODIHR që janë kushte dhe ato për zgjedhje të lira tregonin që e kishim demagogji kërkesën për zgjedhje të lira, por nuk e kemi për demagogji”, tha Berisha.
Kandidatët e pavarur, Berisha: Nuk ishte vendim i gabuar, me Ramën s’bën dot zgjedhje
Kryetari i Partisë Demokratike, Sali Berisha u shpreh gjatë një bashkëbisedimi online me qytetarët se vendimi për të dalë në zgjedhjet e pjesshme të 9 nëntorit me kandidatë të pavarur nuk ishte gabim. Ai tha se votimet faktuan dy gjëra: Rama nuk bën zgjedhje dhe populli e braktisi atë.
“Në vlerësimin tim nuk ishte asnjë gabim. Së pari opozita dëshmoi dhe duhet të dëshmojë vullnet për hapje. I falënderoj shumë të gjithë ata që kandiduan si të pavarur. Çfarë faktoi kjo? Në asnjë variant Edi Rama zgjedhje nuk bën. Së dyti, populli e braktisi Edi Ramën. Kjo tregon që ne si opozitë duhet të kapitalizojmë revoltën që ekziston në shpirtrat dhe zemrat e shqiptarëve, ta kthejmë në një energji”, tha Berisha.
Kreu i demokratëve tha krimi i organizuar nuk lejon rotacionin e pushtetit dhe rruga e vetme e opozitës janë protesta. Me këtë rast shpjegoi edhe si do funksionojë “parlamenti” i ri që do të ngrejë opozita para kryeministrisë.
“Protesta e ditës së hënë ka këtë karakter. Hapim një foltore, një parlament. Domethënë, ju keni parë se në dhjetë seanca, opozita është lejuar të debatojë vetëm në një seancë si kurrë në ndonjë vend pluralist apo historinë e këtij vendi, atëherë ne para këtij bllokimi të plotë hapim foltoren parlamentaro-qytetare para kryeministrisë një herë në javë, ku do thonë qëndrimin e tyre. Protestat e tjera po projektohen dhe organizohen”, tha Berisha.
