Mazhoranca e opozita pritet të ulen sot, në Komisionin e Posaçëm për Reformën në Drejtësi. Kryetari i grupit parlamentar të LSI-së, Petrit Vasili e konsideroi dje këtë si një mundësi për të minimizuar distancat që i ndajnë dy palët për një reformë kaq të rëndësishme, shkruan Gazeta Shqiptare.
Në një prononcim, Petrit Vasili përshëndeti marrëveshjen e arritur mes palëve dhe akordin për dialog politik, dialog për të cilin LSI-ja kishte këmbëngulur në vazhdimësi, si rruga që afronte palët. “Tavolina, dialogu politik është një mundësi që distancat të minimizohen, pra të ecet drejt konsensusit, dhe them se një reformë kaq e madhe, kaq e komplikuar, pa debat do të kishte qenë një proces fiktiv i pabesueshëm. Debati dhe zbutja e distancave nëpërmjet debatit është logjika me të cilën ecën politika. Politika është e thirrur që të marrë vendime. Është ajo që do t’i marrë vendimet”, tha Vasili.
Pas rekomandimeve përfundimtare për reformën në drejtësi, PD-ja ka publikuar një paketë me 10 pika, që kërkon konsensus, dhe kreu i grupit të LSI-së, Petrit Vasili garanton se në tryezë palët nuk do të ulen me paragjykime. “Nuk besoj që asnjëra palë do të hyjë me paragjykimin që ‘këtu jo’ dhe ‘këtu absolutisht po’. Pra ‘jo’-të dhe ‘po’-të kategorike e minojnë debatin”, u shpreh Vasili.
Ndërkohë po dje deputeti demokrat, Eduard Halimi deklaroi se PD-ja nuk heq dorë nga 10 çështjet e ngritura më herët por sqaroi se “nuk po themi se janë 10 kushte dhe po të mos vendoset kështu, bëhet nami. Ne po themi këto janë 10 çështje që ne pranojmë të dialogojmë”, sqaroi Halimi.
