Komisioni i posaçëm parlamentar që po heton vendimet e Presidentit Ilir Meta për anulimin e zgjedhjeve të 30 Qershorit, si dhe dekretimin e një date tjetër më 13 Tetor, pritet ta thërrasë këtë të fundit në datën 6 Shtator, në mënyrë që ai të japë versionin e tij për dekretet
Mbledhja zyrtare e anëtarëve të komisionit do të mbahet të martën.
Mbetet për t’u parë nëse Presidenti do t’i përgjigjet thirrjes, apo do të presë takimet e ekspertëve të Venecias para se të paraqitet në Kuvend.
Sipas rregullores së Kuvendit dhe ligjit për komisionet hetimore, Presidenti i Republikës është i detyruar të paraqitet në një seancë kur të thirret nga Kuvendi.
Nëse ai nuk pranon të marrë pjesë, atëherë mund të thirret me forcë.
Sakaq, ekspertët e Venecias do të vijnë në Tiranë në datat 9-11 shtator, ku do të takojnë, krahas Presidentit, edhe anëtarët e Komisionit Qendror të Zgjedhjeve, Kolegjit Zgjedhor, anëtaren e vetme të Gjykatës Kushtetuese, Vitore Tusha, dhe anëtarët e komisionit hetimor për shkarkimin e Metës.
Deri më 8 Tetor, deputetët kanë kohë t’i paraqesin Kuvendit raportin me gjetjet për shkarkimin e Presidentit.
Brenda pesë ditësh nga votimi i tij, Gjykata Kushtetuese, që ende funksionale, nuk duhet të shprehet për verdiktin përfundimtar. Megjithatë, ekziston një tjetër variant, që anëtarët e opozitës të kërkojnë shtyrjen e punimeve të komisionit deri sa të ngrihet Gjykata Kushtetuese.
Pavarësisht këtyre zhvillimeve, Presidenti Ilir Meta dhe opozita jashtë Kuvendit shprehen të bindur se dekreti për zgjedhjet e 13 Tetorit është kushtetues .
Kuvendi nisi sot seancën e parë plenare për sesionin e ri parlamentar, ndërkohë që të gjitha dekretet që Meta ka kthyer për rishqyrtim pritet të miratohen nga deputetët e maxhorancës dhe nëse është nevoja edhe me votat e deputetëve të opozitës së re. Këta të fundit janë shprehur skeptikë, lidhur me faktin se kryeministri Edi Rama po i kushton më tepër vëmendje opozitës jashtë dyerve të Kuvendit, teksa edhe sot kryeparlamentari Gramoz Ruçi bëri sërish thirrje për dialog.
/a.r
