Komisioneri për zgjerimin Olivér Várhelyi prezantoi sot propozimin për të çuar përpara procesin e zgjerimit të BE-së. Në fjalën e tij, Várhelyi theksoi se zgjerimi i Bashkimit Evropian në Ballkanin Perëndimor është një përparësi kryesore për Komisionin.
“Ne jemi duke punuar në tre pista: Së pari, sot ne propozojmë hapa konkret se si të përmirësohet procesi i pranimit. Ndërsa ne jemi duke forcuar dhe përmirësuar procesin, qëllimi mbetet anëtarësimi dhe anëtarësimi i plotë në BE. Së dyti, dhe paralelisht, Komisioni qëndron fort në rekomandimet e tij për të hapur negociatat e pranimit me Maqedoninë e Veriut dhe Shqipërinë dhe së shpejti do të sigurojë një përditësim mbi përparimin e bërë nga këto dy vende. Së treti, në përgatitjen e Samitit BE-Ballkan Perëndimor në Zagreb në maj, Komisioni do të paraqesë një plan zhvillimi ekonomik dhe investimesh për rajonin” u shpreh Várhelyi.
Ai tha se zgjerimi i BE në Ballkanin Perëndimor është një përparësi kryesore për komisionin.
”Ballkani Perëndimor është një përparësi kryesore për ne. Sot ne propozojmë hapa konkretë se si të përmirësohet procesi i pranimit në BE. Ne mendojmë duhet që të përfshijmë më shumë shtete në monitorimin e procesit duke e shpërndarë ne disa institucione. Proçesi duhet të jetë më dinamik në mënyrë që të zgjidhim më shumë çështjet teknike”, deklaroi Várhelyi.
Komisioneri për zgjerim u ndal edhe te zbatimi i ligjit në vende aspirante si një nga elementët kryesore ku duhet monitoruar me imtësi.
”Zbatimi i ligjit është një tjetër element ku duhet të jemi te hapur dhe duhet ta monitorjmë gjatë gjithë procesit. Përsa i përket Ballkanit Perëndimor, nëse ato janë gati për të nisur negociatat atëherë edhe ne jemi gati. Jemi gati për të mbyllur këtë kapitull në një vit por varet dhe nga vendet aspirante dhe nga përpjekja e këtyre vende. Duhet t’i shohim më në detaje për kushtet e plotësuara ndaj duhet përfshirja e të gjithë vendeve anëtare në këtë proçes. Pas komunikimit kemi edhe një raport për Shqipërinë dhe Maqedoninë e Veriut dhe po e ndjekim dhe mund të kemi një vendim për hapjen e negociatave përpara Samitit të Zagrebit”, tha ai gjatë fjalës së tij.
Më 19 tetor të vitit të kaluar, Shqipëria dhe Maqedonia e Veriut nuk morën dritën jeshile nga BE për çeljen e negociatave.
Qëndrimin më të fortë kundrejt çeljes së negociatave me të dy vendet e kishte Franca, ndjekur nga Holanda dhe Danimarka. /e.s/
