Kombëtarja e Iranit është tërhequr nga pjesëmarrja në Kupën e Botës 2026, e cila do të zhvillohet këtë verë në SHBA, Meksikë dhe Kanada.
Lajmi u konfirmua nga ministri i Sportit të Iranit, Ahmad Donyamali, gjatë një interviste televizive, ku ai deklaroi se Irani nuk ka asnjë synim të marrë pjesë në këtë aktivitet pas vrasjes së liderit suprem, Ali Khamenei.
Donyamali akuzoi drejtpërdrejt qeverinë amerikane për përfshirje në konfliktet që kanë përfshirë Lindjen e Mesme në muajt e fundit, duke theksuar se situata e luftës dhe numri i lartë i viktimave civile e bëjnë të pamundur praninë e sportistëve iranianë në tokën amerikane.
“Pasi qeveria e korruptuar vrau udhëheqësin tonë, nuk ka më kushte që na lejojnë të marrim pjesë në Kupën e Botës”, tha ai.
Ky vendim vjen pak kohë pasi presidenti i FIFA-s, Gianni Infantino, deklaroi më herët se presidenti amerikan Donald Trump kishte garantuar mirëpritjen e ekipit iranian. Përkundër shpresës së FIFA-s se Botërori do të shërbente si një urë bashkimi, Irani ka zgjedhur bojkotin total.
Skuadra iraniane ishte shortuar në Grupin G dhe ishte parashikuar t’i zhvillonte të gjitha ndeshjet e fazës së grupeve pikërisht në SHBA, konkretisht në Los Anxhelos dhe Seattle, kundër Zelandës së Re, Belgjikës dhe Egjiptit.
Tashmë, FIFA pritet të vendosë nëse do të zëvendësojë Iranin me një tjetër kombëtare, duke u bazuar në nenin 6.7 të rregullores, i cili i jep organizatës të drejtën diskrete për të zgjedhur një federatë pasuese në raste të tilla tërheqjesh.
