Lojtaret e ekipi kombëtar të futbollit të Afganistanit arritën një “fitore të rëndësishme” të martën, kur sëbashku me një grup prej më shumë se 75 personash, u evakuuan nga Kabuli.
Sindikata globale e futbollistëve FIFPRO falënderoi qeverinë australiane, që bëri të mundur evakuimin e lojtareve, zyrtarëve të ekipit dhe anëtarëve të familjeve nga Afganistani.
“Këto femra të reja, si sportiste dhe aktiviste, kanë qenë në një pozitë rreziku dhe në emër të bashkëmoshatareve të tyre në të gjithë Botën falënderojmë bashkësinë ndërkombëtare për ndihmën e tyre,”– tha sindikata në një deklaratë.
Skuadra afgane u krijua në vitin 2007 në një vend, ku gratë që luajnë sport u panë si një lëvizje politike kundër talebanëve.
Lojtaret ishin këshilluar këtë muaj që të fshinin postimet në mediat sociale dhe fotografitë e tyre me ekipin për të shmangur hakmarrjet që kur qeveria afgane e mbështetur nga Shtetet e Bashkuara ra.
“Ditët e fundit kanë qenë jashtëzakonisht stresuese, por sot ne kemi arritur një fitore të rëndësishme,”– tha ish-kapitenia e ekipit Khalida Popal.
Popal ishte në mesin e një ekipi avokatësh dhe këshilltarësh të FIFPRO, të cilët kanë punuar me autoritetet në gjashtë vende, përfshirë Australinë, SHBA dhe Mbretërinë e Bashkuar, për t’i futur atletët dhe familjet e tyre në listat e evakuimit dhe fluturimet drejt sigurisë.
“Gratë futbolliste kanë qenë të guximshme dhe të forta në një moment krize dhe ne shpresojmë se ato do të kenë një jetë më të mirë jashtë Afganistanit,”– tha Popal.
Sekretari i përgjithshëm i FIFPRO, Jonas Baer-Hoffmann tha se evakuimet ishin një proces tepër kompleks. “Zemrat tona shkojnë për të gjithë të tjerët që mbeten të bllokuar në vend kundër vullnetit të tyre,” – tha ai./m.j
