Një operacion sekret antidrogë u zhvillua pak ditë më parë në Kolonjë në qarkun e Korçës. Forcat e Ndërhyrjes së Shpejtë dhe Shërbimi i Kontrollit të Brendshëm gjetën 17 mijë rrënjë kanabis në fshatin Qinam-Radovicke.
Hetimi për këtë rast kishte rreth 3 muaj, ku agjentë të SHÇBA-së kanë vëzhguar zonën dhe disa kolegë të tyre. Ka pasur dyshime se disa punonjës të rolit bazë të policisë qëndronin në hyrje të fshatit, duke “ruajtur” kanabisin e mbjellë nga banorët.
Ankesat e ardhura në SHÇBA dhe prokurori flisnin se edhe drejtues policie ishin lidhur me trafikantë dhe për këtë arsye, kur u bë operacioni, gjithçka është mbajtur e fshehtë. Fshati jeshilonte nga të mbjellat dhe u asgjësuan 17 mijë rrënjë, që e përllogaritur në lekë, nëse do të dilte në treg, kishte vlerë disa milionë euro.
Gjithsesi, të dhënat nga Prokuroria e Korçës thanë për gazetën “Shqip” se dyshohet se të implikuar janë disa inspektorë të zonës në fjalë, të cilët kanë pasur pikërisht detyrën që të raportonin për të mbjella hashashi. Ata, jo vetëm që nuk e bënë siç duhet detyrën, por edhe e “ruanin” kanabisin.
Mësohet se në hetimet e prokurorisë do të përfshihen edhe drejtuesit e Komisariatit të Policisë në Ersekë apo edhe Drejtoria e Policisë në Korçë. Do të shikohen tabulatet telefonike të inspektorëve të zonës, me cilët kanë biseduar, për të gjetur edhe lidhjet. Megjithatë, siç edhe ndodh rëndom në gjithë Shqipërinë, edhe gjatë këtij operacioni nuk pati asnjë të arrestuar, duke ngritur dyshime të mëdha se operacioni i Prokurorisë së Korçës mund të jetë dekonspiruar edhe nga SHÇBA-ja.
