Gjykata e Krimeve të Rënda ka dhënë masën e sigurisë arrest me burg për gjyqtarin Shkëlim Miri. Ishte kërkesa e prokurorisë që gjyqtari të lihej në burg për të vijuar hetimet.
Gjyqtari u ndalua tre ditë më parë në kuadër të hetimit për marrjen e 20 mijë eurove në këmbim të lirimit të të dënuarit për vrajse Gentian Doda.
Në shtëpinë e Mirit gjatë kontrollit të policisë u gjet një shumë monetare me vlerë 340 milionë lekë të vjetra. Shkëlqim Miri u ndalua për dyshimet e korrupsionit, ndërsa në banesën e tij u sekuestruan gjatë kontrollit me vendim gjykate 174 mijë eurë, mbi 10 milionë lekë dhe 1 mijë dollarë.
Miri rrezikon një dënim nga 5 deri në 12 vjet burg, nëse shpallet fajtor, në bazë të akuzës për korrupsion pasiv të ngritur nga Prokuroria.
Me masën e dhënë nga gjykata nuk u pajtua avokati mbrojtës, Ardian Visha, i cili tha se nuk ka prova për ta mbajtur në burg. Sa i takon shumës së konsiderueshme të parave që iu gjetën në banesë gjyqtarit, Visha tha se ato janë të ligjshme dhe të siguruara nga të afërmit të cilat do përdoreshin për të blerë një banesë dhe ndërhyrjen kirurgjikale për gjyqtarin i cili sipas tij vuan nga një sëmundje e rëndë.
“Për pjesën e gjetur në dhomë janë para të familjarëve të gjyqtarëve, janë marrëdhënie kontraktuale mes gjyqtarit dhe të afërmve. Një pjesë e parave do përdoreshin për banesë dhe pjesa tjetër për një ndërhyrje kirurgjikale për gjyqtarin i cili vuan nga tumori në kokë”, tha Visha.
Dyshohet se pasi është dorëzuar shuma prej 20 mijë eurosh, Gentian Doda është lajmëruar me telefon se ai do të lirohej.
Është zbuluar se i arrestuari Alban Buçi, një prej sekserëve që është bërë ndërmjetës për pagesën e parave te gjyqtari Miri, është kushëri i Gentian Dodës.
Hetimet për të kishin nisur në janar 2017, pas informacioneve se gjykatat shqiptare po i jepnin lirinë Gentian Dodës, i akuzuar për vrasje dhe i ekstraduar nga Amerika 5 vjet më parë.
a.ç
