Dy nga deputetët kryesorë të mazhorancës po vijojnë të shkëmbejnë shigjeta në distancë, në lidhje me gjendjen ku ndodhet sot qeverisja e majtë, por edhe për aspekte kurioze e të pazakonta. Sipas Blushit, një nga burimet e të keqes në partinë socialiste aktuale, janë ata që i ka quajtur “kanabistët”, duke nënkuptuar indirekt deputetin Kokëdhima, i cili është shprehur për liberalizimin e kultivimit të drogave të lehta.
Përplasja Blushi-Kokëdhima shihet si një pasojë direkte e konfliktit që Blushi ka me Ramën. Ajo është gjithashtu pasqyrim i një humori negativ që ekziston sot në shumicën qeverisëse, në lidhje me pushtetin e madh që ka akumuluar Koço Kokëdhima në PS, duke u bërë praktikisht një figurë dominuese mes deputetëve socialistë. Nga shumë ligjvënës të së majtës, Kokëdhima shihet si një biznesmen që i ka hyrë politikës, duke zgjeruar rrethin e interesave dhe influencën e tij në instancat shtetërore.
