Eksperti i ekonomisë Enriko Ceko duke folur në emisionin “Dita Jonë” për efektet e luftës në Lindjen e Mesme në çmimin e naftës, theksoi se në Shqipëri duhet hequr akciza mbi naftën.
Sipas tij kjo do të bëjë që nafta të bjerë nga 175 lekë për litër në 135, dhe nëse do të shtohet 40 lekë për shkak të luftës, do të jetë sërish në çmimin e tanishëm.
“Unë e kam thënë 100 herë, që ne kemi një diferencë çmimi të naftës me 60 lekë, mes Shqipërisë dhe vendeve në rajon, sepse kemi akcizë të naftës, që e çon çmimin e naftës automatikisht 40 lekë. Nafta futet në territorin e Shqipërisë 60 lekë për litër, pa u futur në doganë, paguhet akciza. Nga 60 lekë nafta vajti 96,5 lekë. Pas akcizës paguhet TVSH-ja 20 lekë. Domethënë çmimi i naftës pa u futur në territorin e Shqipërisë vajti 120 lekë, dhe pastaj e marrin pikat e shpërndarjes së karburantit. Po mirë se do fitojë edhe 5 lekë ai i pikës së karburantit, por duhet hequr akciza. Akciza llogaritet 18-20 milionë euro në muaj. Nëse qeveria do heqë dorë nga 20 milionë euro në muaj, dhe do t’ua lërë qytetarëve, do bjerë çmimi i naftës nga 175 në 135. Pastaj le të shtohet 40 lekë për shkak të luftës“, tha Ceko.
