Banorët e lagjes “Naftëtari” në Patos-Marinzë protestojnë ditën e sotme ndaj kompanisë kanadeze naftënxjerrëse “Bankers Petroleum”. Qindra banorë, mes të cilëve gra dhe fëmijë që nga mbrëmja e djeshme kanë bllokuar rrugën hyrëse ku automjetet e kompanisë kalojnë për në fshat. Ata pretendojnë se në lagjen e tyre ende nuk janë vlerësuar dëmet në bujqësi dhe blegtori, edhe pse shpërthimet e 1 prillit në puset e naftës në Marinzë shkaktuan dëme edhe në lagjen e tyre.
Jo vetëm kaq, por banorët kërkojnë që të trajtohen me ndihmë financiare njësoj si banorët e tjerë, shtëpitë e të cilëve ndodhen shumë pranë puseve të naftës ku Bankers ushtron aktivitetin.
Banorët kërcënojnë se protesta e tyre nuk do të ndalet por përkundrazi. Këta banorë protestuan edhe dje para zyrave të informacionit të “Bankers Petroleum” ku thanë se procesi i vlerësimit të dëmeve nuk ka qenë i saktë pasi ata janë lënë jashtë dëmshpërblimit.
Redaksia Online
(Javanews.al)
