Të lësh duhanin është realisht një “iniciativë e madhe” për t’u ndërmarrë, mirëpo është një nga veprimet më të mira që mund të bëni gjatë gjithë jetës suaj.
Pa përmendur prindërit, apo familjarë të tjerë që vazhdimisht ju thonë: “lëre duhanin”, në fakt, është koha që të mendoni përtej kësaj, më thellë.
Ekspertët në mbarë botën janë të mendimit se lënia e duhanit kërkon një vullnet të fortë e të hekurt dhe në këtë pikë nuk po flasim për lënie të duhanit të tipit: “sa të shkojë lë të shkojë kjo radhë pa pirë cigare, ‘herën tjetër’ do mundohem më shumë pasi është pakëz vendim i vështirë!”
Shumica e njerëzve e pinë duhanin për relaks e disa të tjerë nga stresi i tepërt, mirëpo dëmet që shkakton ai në organizëm janë të pariparueshme e të pakthyeshme. E vetmja mënyrë për të shpëtuar, është lënia e tij…sado klishe që të tingëllojë kjo fjali, është më se e vërtetë.
Që të flasim pak për disa këshilla të vogla që do iu vijnë shumë në ndihmë.
Këshilla e parë është: Ndani mendjen, asgjë nuk është më e fortë se vullneti juaj. Bindeni veten që duhet të lini duhanin dhe pastaj çdo gjë tjetër është shumë më e lehtë.
Së dyti, duhet që ta dini se javët e para mund të jenë të vështira, pasi organizmi është mësuar me ‘dozën’ e përditshme të nikotinës, mirëpo mund të zëvendësohet. Si? Këtu sërish është vullneti juaj i fortë ai që iu vjen në ndihmë. Alternativa të tjera janë, joga, noti, ngrënia e një çamçakëzi kur jeni të nervozuar, etj.
Një tjetër ide e mirë dhe efektive është që t’ju thoni të afërmve dhe rrethit tuaj të ngushtë shoqëror që po e lini duhanin njëherë e përgjithmonë.
Gjasat janë të shumta që ata t’iu përkrahin dhe t’iu motivojnë akoma më shumë në përmbushjen e “misionit” tuaj. Duhanpirja dihet botërisht që konsiderohet arsyeja kryesore e kancerit dhe arsyeja e parë e vdekjes nga kanceri si për meshkujt ashtu edhe për femrat dhe gjithsecili prej jush mund të arrijë që të heqë dorë, sa është në kohë.
Duhet të dilni nga “zona e rehatisë” dhe të “hapni sytë” për të kuptuar dëmin e madh që po i shkaktoni shëndetit. Për shembull, e keni kuptuar sa të dobët ndiheni fizikisht kur dilni për të bërë vrap apo kur bëni not? Shumica prej jush habitet me veten dhe menjëherë çon nëpërmend fjalinë: “Si ka mundësi, unë kam qenë shumë më i zhdërvjellët…”
Pikërisht, shkaktari është DUHANI!
Mos harroni që gjatë kohës që po e lini, nuk duhet në asnjë mënyrë që të mbani dietë. Mungesa e nikotinës mund t’ju bëjë paksa nervoz ditët dhe javët e para, dhe e mira është që të konsumoni sa më shumë fruta dhe perime e të ushqeheni mirë. Dhe në fund, nuk na mbetet gjë tjetër veçse t’iu themi: Shpëtoni veten dhe ndihuni përbrenda dhe së jashtmi të bukur, dhe në gjendje të mirë mendore dhe shëndetësore! Asnjë stimulant nuk mund ta bëjë këtë më mirë se sa neuronet tuaja!(TT News)/l.m
