Ministrja e mbrojtjes Mimi Kodheli ka bërë një koment sot me rastin e 65 vjetorit të Forcave Ajrore të ushtrisë shqiptare.
Nëpërmjet një postimi në Facebook ministrja shprehej se: “Sot, 65 vjet pas fluturimit të avionit të parë shqiptar, në radhë të parë përulem me respekt në nder të gjithë burrave e djemve që kanë rënë në krye të detyrës, në shërbim të vendit. Falenderoj të gjithë ata ushtarakë që kanë kontribuuar në krijimin dhe ngritjen e Forcës Ajrore shqiptare”.
Më tej, me modesti, minstrja pranonte (ndoshta për herë të parë publikisht nga një funksionare e rangut të saj), se edhe pse është pjesë e NATO-s, potenciali i sotëm i ushtrisë shqiptare nuk mund të krahasohet me atë që kishte vendi në kohën e komunizmit.
“Ky 65-vjetor ndoshta nuk e gjen Forcën tonë Ajrore aq të madhe sa dikur, por me siguri që e gjen profesionale, moderne, dhe që i përgjigjet më së miri sfidave dhe aleancave aktuale|, shkruante ajo.
Kodheli e mbyll komentin duke “falenderuar pilotët aktualë të Forcës Ajrore që me nder vijojnë traditën e shkëlqyer të paraardhësve dhe mësuesve të tyre”.
Pak kohë më parë një helikopter i ushtrisë u rëzua në Liqenin e Shkodrës duke i marrë jetën dy pilotëve.
Për ngjarjen po vijojnë hetimet. / mapo
