Një tjetër konventë zgjedhore për të përcaktuar fatin e koalicionit. Pavarësisht se një ditë më parë e quajti bashkëpunimin me PS-në me potencial të lartë dhe ende të pashfrytëzuar, kryetari i Lëvizjes Socialiste për Integrim, Ilir Meta, gjatë intervistës për Report Tv sqaron se do të jenë strukturat e zgjedhura këtë fillim dhjetor ato që do kenë fjalën finale, ndoshta duke e hedhur dhe në votë anëtarësi si në Konventë.
“3-4 dhjetori është konventa dhe i takon këtyre forumeve që përzgjedh konventa apo qoftë edhe vetë konventës për të marrë vendimet e duhura”- tha Meta.
Për pjesën tjetër të reformës në drejtësi, paketën me 28 ligjet e reja, meta thekson se duhet pritur dhe opozita.
“Ne besojmë se opozita duhet të marrë pjesë pme përgjegjshmëri në këtë reformë. Besoj se standartet e Venecias duhet të na udhëheqin.”- deklaroi Meta.
Por ndryshe nga aleati Rama, ai ka një opinion ndryshe mbi rrezikun e tjetërsimit të vettingut nga Gjykata Kushtetuese.
Ndërkaq, në Konventën Zgjedhore të LSI-së aparatit të ri drejtues të partisë u miratuan dhe ndryshimet në statut.
Rregullorja e brendshme e partisë tashmë legjitimon dhe fraksionet brenda kësaj force, të cilët mund të kenë dhe njerëzit e tyre në forumet drejtuese të partisë.
Po ashtu në statut sqarohet gjerësisht si do të kryhet auditi i financave të LSI-së, i jepen më shumë kompetenca Sekretarit të Përgjithshëm dhe Këshillit Ankimor Kombëtar, që do zgjidhë mosmarrëveshjet brenda strukturave të partisë.
Fjalën e fundit për këto ndryshme do ta kenë Kryesia dhe Këshilli Drejtues Kombëtar në një moment të dytë.
