Nga ARTUR AJAZI
E mbajmë mënd të gjithë, se si veproi opozita e sotme me pushtetin që mori në 2005. E mbajmë mënd të gjithë, se si pa mbushur muajin, largoi nga puna 3 mijë kundërshtarët e parë politikë. Se si flaku në rrugë specialistët, të aftët dhe të shkolluarit, dhe i mbushi institucionet me dipllomblerët.
Nuk kishte cep të institucioneve, që nuk u boshatis, dhe në vendin e tyre u emëruan “specialistët” e partisë.Policia, ushtria, hipoteka, tatimet, arsimi, shëndetësia, strukturat e tjera ligjzbatuese, u mbushën me elementë të ardhur nga rruga.Situata dukej e pashpresë, derisa zullumi i mbyti, dhe u larguan me mbi 1 milion vota nga pushteti. Ajo ç’ka mbeti, ishte një hata.
Vjedhje dhe zhvatje nga të katër anët. Abuzime dhe shkelje ligjore flagrante, përvetësime të papara nga ish-drejtues, ish-ministra, ish-zv.ministra, (në emër të shefit të madh) nga ata që sot janë rikrthyer dhe kërkojnë sërish pushtetin. Ata sot janë bërë sërish bashkë. Si para 8 vitesh, kur vidhnin, grabisnin, mashtronin dhe përvetësonin pasurinë dhe paranë e shqiptarëve. Rikthimin në pushtet,e kërkojnë në emër të “ndershmërisë, barazisë, dhe luftës ndaj korrupsionit qeveritar”.
O Zot, si mund të jenë kaq të paturpshëm, kaq të pamoralshëm, ata që sa kishin pushtetin nuk u dalluan as për ndershmëri, as për barazi, dhe as për luftë ndaj korrupsionit. Ata vepronin sipas stilit të shefit të tyre. Grabiste ai, grabisnin edhe ata, zhytej ai në korrupsion, zhyteshin edhe ata, shiste ai pronat e shtetit dhe të shqiptarëve, shisnin edhe ata,firmoste ai për të pasuruar fëmijët dhe familjarët, ashtu bënin edhe ata. Gjithçka ishte kthyer në një “kasaphanë”, ku vidhej dhe zhvatej paraja e taksapaguesve, dhe pasurohej vetëm një grusht njerëzish të pandjeshëm, të pandershëm, huliganë dhe të poshtër.
Kjo ishte panorama që ata lanë pas, kur u larguan me turp nga pushteti.Por sot kërkojnë të rikthehen në pushtet. Kanë kurajon të deklarojnë “koalicione partish” kanë kurajon të flasin në emër të “parimeve, lirisë dhe demokracisë”, kanë guximin të bëjnë moral mbi “luftën ndaj korrupsionit” për “drejtësinë e munguar”, etj. Dhe kush, ata që çdo zyrë të shtetit, e kishin kthyer në mejhane dhe skutë bixhozi, nga ku edhe trokitja në derë blihej me para. Por sërish kërkojnë të rikthehen në pushtet.
Ata që nuk njihnin normat dhe kriteret e ushtrimit të detyrës, ata që përdhosën dhe zhvatën zyrat dhe korridoret e institucioneve, dhe nuk vunë “një tullë” në bërjen e shtetit ligjor. Ata sot janë bashkuar. Kanë krijuar “koalicionin e lubive”. Ata janë të etur për pushtet, për para dhe hakmarrje, ndaj atyre që janë sot në pushtet. Ndaj atyre që ringritën shtetin nga gërrmadha financiare, ndaj atyre që ndryshuan pamjet dhe funksionin e qyteteve, ndaj atyre që rivunë në punë strukturat e paralizuara të shtetit, ndaj atyre që reformuan drejtësinë e kalbëzuar.
Ata janë “koalicioni lubive”. Çdo parti e atij koalicioni, pret me padurim të marrë “plaçkën” e pushtetit, dhe ta shqyejë, ta grisë, ta shesë dhe mbushë xhepat me para. Ç’nuk po premtojnë, ç’nuk po thonë, po betohen dhe përbetohen, për të treguar se “kanë ndryshuar, dhe nuk janë ata të 2005-2013”. A thua ti besojnë shqiptarët “engjëjt” e koalicoonit të lubive …..?
