Kanë mbetur edhe tri ditë nga fillimi i Botërorit të Katarit dhe përveç ndryshimeve të minutës së fundit, 32 skuadrat pjesëmarrëse i kanë tashmë listat e tyre përfundimtare.
Vendin e parë në klubet që kontribuojnë me më shumë lojtarë në Kupën e Botës e mban Bayern Munich. Gjigantët bavarezë kanë 17 përfaqësues të shpërndarë në kombëtare të ndryshme. Klubi bavarez është ai me më shumë përfaqësues në Botëror, duke luajtur deri në 10 ekipe të ndryshme.
Pothuajse gjysma e të thirrurve do të veshin fanellën gjermane: Neuer, Kimmich, Musiala, Goretzka, Thomas Müller, Gnabry dhe Sané. Pjesa tjetër do të luftojë me Francën (Upamecano, Pavard, Lucas Hernández dhe Coman), Kanadanë (Davies), Senegalin (Sadio Mané), Holandën (De Light), Kroacinë (Josip Stanisic), Kamerunin (Choupo-Moting) dhe Marokun (Mazraoui).
Në vendin e dytë, bavarezët ndiqen nga afër, me një lojtar më pak, nga Barcelona. Katalanasit janë skuadra e La Liga-s me më shumë lojtarë në Kupën e Botës, 16 të tillë. Luis Enrique ka thirrur 7 lojtarë të Barçës për të mbrojtur ngjyrat e Spanjës dhe për të kërkuar yllin e dytë. Ata janë: Eric García, Jordi Alba, Busquets, Pedri, Gavi, Ansu Fati dhe Ferrán Torres.
Nga ana e tij, Robert Lewandowski do të përjetojnë Botërorin e dytë me Poloninë. Ousmane Dembélé do të luajë me Francën, Raphinha te Brazili, Ronald Araujo tek Uruguaji, Ter Stegen te Gjermania, De Jong dhe Memphis Depay te Holanda, si dhe Christensen te Danimarka.
Në vendin e tretë është Manchester City i Guardiolës. Skuadra angleze do të kontribuojë me 16 lojtarë në Kupën e Botës. Pesë prej tyre do të mbrojnë ngjyrat e Anglisë: John Stones, Walker, Kalvin Philips, Jack Grealish dhe Foden. Pjesa tjetër do të përfaqësojë: Laporte dhe Rodri (Spanja); Rubén Días, Cancelo dhe Bernardo Silva (Portugalia), De Bruyne (Belgjika); Gündoan (Gjermania); Aké (Holanda); Julián Álvarez (Argjentina) dhe Akanji (Zvicra).
Ky “podium” pasohet nga Manchester United me 14 përfaqësues, Real Madridi me 13 përfaqësues, Chelsea me 12 përfaqësues dhe PSG, gjithashtu me 12 lojtarë. Çdo klub merr para në bazë të numrit të përfaqësuesve që ka në “Katar 2022”. Çdo klub merr 10.220 euro në ditë për çdo lojtar që është në Botëror.
/s.f
