Kontrolli i Lartë i Shtetit kallëzon penalisht drejtorin e Tatimeve në Berat dhe dy ish drejtorë të kësaj drejtorie. Në një njoftim për shtyp KLSH bën të ditur se në Drejtoritë Rajonale të Tatimeve(DRT) Elbasan dhe Berat u konstatuan të ardhura të munguara në buxhetin e shtetit për të dy DRT në shumën rreth 147 milionë lekë ose mbi 1 milion euro dhe dëm ekonomik në DRT Berat rreth 59 milionë lekë ose mbi 421 mijë euro.
“Kontrolli i Lartë i Shtetit, nga auditimi mbi zbatimin e legjislacionit tatimor, të ushtruar në Drejtoritë Rajonale të Tatimeve, Elbasan dhe Berat, ka konstatuar gjatë periudhës 2013 – 2014 mospërputhje në veprimtarinë e administratës tatimore me kërkesat e kuadrit rregullator në procedura dhe të meta e mangësi në zbatimin e legjislacionit dhe akteve administrative që rregullojnë veprimtarinë e administratës tatimore në procesin e realizimit të të ardhurave tatimore dhe kontributet e sigurimeve shoqërore e shëndetësore”, thuhet në njoftimin pr shtyp.
Në bazë të raporteve të auditimit, Kryetari i KLSH, me anë të një vendimi që mban datën 30 qershor 2015, për përmirësimin e punës në të ardhmen i ka rekomanduar Drejtorise së Përgjithshme të Tatimeve (DPT) dhe Ministrisë së Financave propozim për një ndryshim në pikën 77.2 të Udhëzimit të Ministrise se Financave nr. 24, datë 02.09.2008 “Për procedurat tatimore në Republikën e Shqipërisë” i ndryshuar; i ka rekomanduar DRT, Elbasan marrjen e 8 masave organizative, 15 masave disiplinore dhe 6 masave me qëllim kërkimin për shpërblimin e dëmit në shumën prej 142,140,306 lekë, si të ardhura të munguara në Buxhetin e Shtetit.
Po ashtu KLSH, me qëllim përmirësimin e punës në të ardhmen, i ka rekomanduar DRT, Berat marrjen e 10 masave organizative, 2 masave disiplinore për largim nga shërbimi civil dhe 11 masave të tjera disiplinore, marrjen e 6 masave për kërkimin për shpërblimin e dëmit në shumën prej 4,805,000 lekë, si të ardhura të munguara dhe në shumën prej 58,796,460 lekë si dëm ekonomik ndaj buxhetit të shtetit, si dhe ka rekomanduar bashkëpunim institucional midis DRT Berat dhe DPT me Drejtorinë e Përgjithshme të Parandalimit të Pastrimit të Parave, me qëllim instalimin e komunikimit institucional ndërmjet tyre.
KLSH ka kryer kallëzim penal për shpërdorim detyre për Drejtorin e DRT Berat G. G. dhe ish-Drejtorët e DRT Berat M.D dhe T.M., per konsumimin e elementëve te veprës penale të “Shpërdorimit të detyrës”, të parashikuar nga neni 248 i Kodit Penal, pasi kane lejuar miratimin në bilancet e subjekteve te shumave të konsiderueshme monetare në lidhje me hua të marra nga subjekte të tjera jashtë procedurave normale ligjore dhe për të cilat nuk është bërë asnjë deklarim nga ana e strukturave përkatëse të DRT te Beratit, si dhe jane favorizuar subjekte tatimpaguese në zhbllokimin e llogarive bankare, për të cilat DRT Berat kishte vendosur më parë bllokimin e tyre. KLSH i ka përcjellë Prokurorisë së Rrethit Gjyqësor Berat të gjitha provat dhe dokumentet përkatëse lidhur me kete kallezim penal.
