Deputeti i PD Klevis Balliu ftoi qytetarët protestues që të shkojnë te Parlamenti dhe së bashku t’i nxjerrin jashtë socialistët, e mandej të vendosin vet protestuesit se çfarë Kodi Zgjedhor duan.
I ftuar në emisionin “Off the Record” nga Andrea Danglli në A2CNN, Balliu theksoi se problemi nuk qëndron te Kodi Zgjedhor, por te fakti që duhet të përballen në zgjedhje me persona që zotërojnë pasuri qindra miliona euro.
Deputeti demokrat po ashtu vuri në dukje nevojën për largimin e kryeministrit Rama dhe mbështetjen për protestat.
“Hajde t’i nxjerrim nga Parlamenti! Nesër është protesta, të vijnë aty në Parlament, t’i qisin përjashta dhe ne i ndihmojmë t’i nxjerrin përjashta, dhe le ta vendosin këta se çfarë Kodi Zgjedhor duan. Por s’është problem te Kodi Zgjedhor. I patë ato kullat? E patë që një person 29 vjeç kishte 135 milionë euro, me atë përballem në zgjedhje unë. Qytetarët janë opozitarë, ka që s’janë me PD-në, ka që janë me PS-në, ka që janë me partitë e tjera. Të iki ky që të shpëtojë ky vend. Këta duhet t’i mbështesim, mos ta relativizojmë çështjen”, tha Klevis Balliu.
