Por më pas ishin vetë gjyqtarët ata që iu drejtuan gjykatës, duke ankimuar ligjin për statusin e gjyqtarëve dhe prokurorëve, duke kundërshtuar shkrirjen e KLD. Edhe pse ankimimi u bë nga Unioni i Gjyqtarëve dhe Shoqata e Gjyqtarëve, një gjë e tillë u nxit dhe nga KLD, pasi Hoxha është anëtar i saj.
Kushtetuesja në fillim të javës zbardhi vendimin duke vendosur që të mos kishte asnjë shkrirje të KLD. Sipas afateve ligjore, më 11 prill KLD duhej të pushonte së funksionuari, por Kushtetuesja e rrëzoi këtë përcaktim, duke deklaruar në vendimin e saj që KLD të jetë në detyrë deri në ngritjen e Këshillit të Lartë Gjyqësor.
Por ky vendim sërish nuk e ka kënaqur Bujar Nishanin dhe gjyqtarët, pasi pritet që të ketë një tjetër ankimim. Brenda pak ditësh, Shoqata e Gjyqtarëve do i drejtohet me një tjetër padi Kushtetueses, duke kërkuar që KLD të ketë kompetenca të plota.
Sipas burimeve, shoqata pretendon se në vendimin e nxjerrë nga gjykata, vendoset që të mos ketë shkrirje të KLD, por nuk ka një vendim të qartë sa i takon kompetencave të saj shkruan “sot”. Ekspertët që hartuan ligjet vendosën që KLD dhe Bujar Nishani të kufizoheshin, duke mos lejuar që të bëhen emërime, por vetëm të komandojnë gjyqtarë.
Arsyeja ishte se kjo duhej t’i lihet në dorë KLGJ. Për këtë gjë, Nishani para futjes së ligjit në fuqi, bëri me dhjetra emërime, duke bërë në këtë mënyrë qokat e fundit. Por tani ligji ia ndalon të drejtën dhe Presidenti është vënë në lëvizje për të rimarrë kompetencat e tij, duke i dhënë një tjetër goditje reformës në drejtësi.
Me shumë gjasë Kushtetuesja do e pranojë ankimimin dhe shumë shpejt Nishani pritet të ketë kompetenca të plota, dukë bërë të gjitha emërimet që dëshiron para se të lërë detyrën më 24 korrik. Gjykata Kushtetuese në vendim e saj e cilësoi të padrejtë shkrirjen e KLD, duke përcaktuar se ajo duhet të jetë në detyrë deri në ngritjen e KLGJ.
“Gjykata vlerëson se ky konstatim nuk mund të konsiderohet se përbën ometim kushtetues, pasi formulimi i pikës 5 të nenit 179 të Kushtetutës se “anëtarët e KLD-së e përfundojnë mandatin e tyre pas krijimit të KLGJ-së, por jo më vonë se zgjedhja e të gjithë anëtarëve të KLGJ-së, sipas ligjit” shpreh dhe synon të sigurojë vlerën kushtetuese të vazhdimësisë dhe koherencës institucionale, për rrjedhojë, funksionimin normal të KLD-së në periudhën kalimtare.
Për sa kohë vullneti i kushtetutëbërësit ka qenë që të mos ndërpritet funksioni i KLD-së, Gjykata vlerëson se KLD-ja ashtu si edhe organet e tjera ekzistuese kushtetuese do të vazhdojnë të ushtrojnë funksionet e tyre deri në konstituimin e plotë të organeve të reja kushtetuese dhe, në këtë kuptim, zbatimi i neneve 160/1 dhe 173/1 të ligjit duhet të jetë në përputhje të plotë me këtë interpretim të Gjykatës, në respekt të frymës së Kushtetutës”, u shpreh gjykata në vendim. Anëtarët janë shprehur dhe sa i takon qëndrimit të presidentit në krye të KLD, duke thënë se Kushtetuta e përcakton që ai qëndron aty derisa të ngrihet KLGJ
ma.me
