Giacomo Zanon, kreu i mjekësisë sportive të grupit “Habilita”, dha një intervistë për “Gazzetta dello Sport”, në të cilën foli për Paul Pogba dhe kohët e rikuperimit që i duhen mesfushorit francez, pas dëmtimit dhe operacionit të meniskut:
“Kupa e Botës është në rrezik. Një meniskektomi kërkon 45 deri në 60 ditë vetëm për t’iu rikthyer vrapimit e lëre më të luajë. Pogba nuk është saktësisht një vrapues i distancave të shkurtëra, ndaj rikuperimi i tij gjithashtu mund të zgjasë më shumë”.
Paul Pogba u përpoq shumë për të shmangur operacionin, por në fund nuk ia doli. Mesfushori francez iu nënshtrua menisketomisë dje për të trajtuar dëmtimin e meniskut anësor të gjurit të djathtë. Në këtë mënyrë ai do të duhet të qëndrojë jashtë edhe për të paktën 40-60 ditë të tjera, përpara se të rifillojë aktivitetin konkurrues.
Kjo do të thotë se do të rikthehet mes mesit dhe fundit të tetorit, me qëllim që të mos humbasë Botërorin në Katar (që do të nisë në mes të nëntorit). Vendimi për operacionin është marrë pas testit të djeshëm në “Continassa”. Pogba sapo kishte filluar të vraponte, të shtunën postoi një foto të tij në një rutine me gravitacion për të mos rënduar në gjymtyrën e dëmtuar.
Dje në mëngjes u përpoq të vraponte në fushë dhe gjithashtu të gjuante topin, por ndjesitë nuk ishin pozitive. Dhimbjet janë ende aty, ndaj “Oktapodi” në marrëveshje me Juventusin, vendosi të mos humbasë më kohë dhe të vazhdojë menjëherë me operacionin.
Pogba, i cili u lëndua në fund të korrikut në stërvitje, gjatë turneut amerikan, kishte zgjedhur të mos bënte operacion dhe të provonte terapitë konservative. Megjithatë, pas 5 javësh trajtim dhe not, rezultatet e dëshiruara nuk arritën. Kështu u vendos ndryshimi i kursit, i cili megjithatë rrezikon praninë e tij në Kampionatin Botëror.
Kohët tani janë të ngushta për t’u rikthyer në formë dhe Juventusi do ta humbasë atë për pothuajse të gjithë pjesën e parë të sezonit. Më së shumti do ta shohim në fushë për disa ndeshje para pushimit të gjatë në fund të vitit.
Nuk është rastësi që Juventusi do të kishte preferuar që ai të operohej menjëherë në Amerikë, për të nisur sa më shpejt fazën e rehabilitimit dhe për ta rikthyer të paktën në shtator. Gjithsesi, fjalën e fundit në këto raste e ka gjithmonë lojtari dhe deri më tani ai ka qenë këmbëngulës.
/e.d
