Doktori i njohur, Hekuran Braho, ndau në studion e emisionit “Java në RTSH” eksperiencën e tij pas kthimit nga Italia, si dhe bëri një apel për vlerësimin e mjekëve.
Braho u shpreh së ne vitin 1994, kur ai iu rikthye punës në vend, jeti një shëndetësi të rrënuar. Ai shtoi se mungesa e investimeve, medikamenteve, e reformave dhe e fondeve ishin të dukshme. Por Braho tha se mjekët shqiptarë bënë një heroizëm në ato vite të vështira duke punuar në kushte të tilla.
Duke u rikthyer në situatën e sotme, kirurgu i njohur tha se trajtimi financiar i mjekut është ‘thembra e Akilit’ në shëndetësi. Ai shtoi se mjekët duhet të paguhen sipas rezultateve që kanë me pacientët, pasi sipas tij barazimi sjell dembelizëm.
“”Mjekët e përjetojnë sëmundjen e pacientit, pavarësisht se në dukje mbase nuk kuptohet. Një mjek dënohet për neglizhencë, por jo për ato që nuk di. Ndaj specializimet dhe kualifikimet janë të nevojshme. Nëse investohet në trajtimin dhe kualifikimin e mjekëve, kjo do t’i kushtonte shtetit më pak në të ardhmen” – tha Dr. Braho.
Sa i përket pezullimit të operacioneve për shkak të pandemisë, ai tha se beson se në fund të majit ndërhyrjet kirurgjikale mund të rinisin.
Braho u ndal edhe te ndërhyrjet estetike duke u shprehur se tregu i sotëm ka shumë kërkesa, por edhe rrezikshmëri për shëndetin e pacientëve.
“Mendoj se duhet më tepër kontroll mbi klinikat që ofrojnë ndërhyrje estetike. Gjithashtu duhet parë me kujdes kualifikimi i mjekut që merr përsipër t’i bëjë këto ndërhyrje” – tha kirurgu në studion e emisionit “Java në RTSH”.
