Ministri i Brendshëm i Italisë, Matteo Piantedosi, ka pranuar zyrtarisht se agjentë të Homeland Security Investigations (HSI), struktura hetimore që varet nga agjencia federale amerikane ICE, do të veprojnë në Itali gjatë zhvillimit të Lojërave Olimpike Dimërore Milano–Cortina 2026.
Prania e tyre do të ketë për qëllim garantimin e sigurisë së delegacioneve të Shteteve të Bashkuara, përfshirë zëvendëspresidentin amerikan J. D. Vance, Sekretarin e Shtetit Marco Rubio dhe sportistët amerikanë, që do të marrin pjesë në garat olimpike. Sipas sqarimeve zyrtare të qeverisë italiane, agjentët amerikanë nuk do të dalin në rrugë dhe nuk do të kenë asnjë rol në ruajtjen e rendit publik, por do të operojnë vetëm nga një sallë operative e ngritur brenda konsullatës amerikane në Milano, duke u koordinuar me autoritetet italiane të sigurisë.
Italia, nga ana e saj, do të angazhojë rreth gjashtë mijë forca të rendit për të garantuar sigurinë e eventit, një vendim i marrë gjatë një mbledhjeje të Komitetit Kombëtar për Rendin dhe Sigurinë Publike, të zhvilluar në Ministrinë e Brendshme. Pas disa ditësh mohimesh, sqarimesh kontradiktore dhe polemikash publike, Piantedosi u detyrua të qartësojë zyrtarisht situatën pas një takimi në Romë me ambasadorin amerikan në Itali, Tilman J. Fertitta.
Në komunikatën e shpërndarë pas takimit thuhet se agjentët e ICE nuk do të kenë funksione të jashtme policore, nuk mund të kryejnë operacione apo kontrolle emigracioni në territorin italian dhe se çdo operacion sigurie në vend mbetet nën përgjegjësinë dhe drejtimin ekskluziv të autoriteteve italiane.
Megjithatë, sqarimet teknike nuk kanë mjaftuar për të shuar tensionet politike. Çështja ka vënë në vështirësi qeverinë e kryeministres Giorgia Meloni dhe ka nxitur reagime të forta si brenda shumicës, ashtu edhe nga opozita. Ministri i Jashtëm Antonio Tajani u përpoq ta minimizojë situatën duke deklaruar se nuk bëhet fjalë për forca të armatosura në rrugë dhe se në terren do të shihen vetëm karabinierë, policë italianë, duke shtuar se agjentët amerikanë nuk janë “SS” dhe nuk do të veprojnë si të tillë. Edhe Piantedosi në një deklaratë televizive, mohoi kategorikisht se agjentët e ICE do të shfaqen në rrugët italiane, duke e cilësuar një hipotezë të tillë si lajm të rremë të përhapur për arsye politike ose nga mungesa e kompetencës.
Nga ana tjetër, opozita vijon të kërkojë transparencë të plotë. Francesco Boccia, në emër të Partisë Demokratike, akuzoi qeverinë se po sillet në mënyrë të paqartë dhe të pavendosur, ndërsa lideri i Lëvizjes 5 Yje, Giuseppe Conte, deklaroi se prania e ICE në Itali nuk duhet të lejohet. Reagimi më i ashpër erdhi nga kryetari i Bashkisë së Milanos, Beppe Sala, i cili tha se nuk ndihet i mbrojtur nga ministri i Brendshëm dhe e përshkroi ICE si një agjenci që në Shtetet e Bashkuara është përfshirë në episode dhune, duke pyetur publikisht nëse Italia nuk mund t’i thotë të paktën një herë “jo” Shteteve të Bashkuara. Në të kundërt, presidenti i rajonit Lombardi, Attilio Fontana nga Liga, shprehu mbështetje të plotë për Piantedosin, duke deklaruar se ndihet i sigurt.
Për shkak të presionit politik dhe polemikave të vazhdueshme, ministri i Brendshëm ka pranuar të raportojë në Parlamentin italian më 4 shkurt për të dhënë sqarime të mëtejshme mbi marrëveshjen dhe rolin e agjentëve amerikanë, ndërsa më 31 janar Partia Demokratike Italiane ka paralajmëruar një protestë në Milano kundër pranisë së agjencisë federale amerikane ICE në Itali gjatë Lojërave Olimpike Dimërore Milano–Cortina 2026.
