Qendra Spitalore Universitare Nënë Tereza do të ketë një strukturë të re spitalore për Kirurgjinë e Përgjithshme me bllok të ri të sallave të operacionit dhe reanimacionin e Kirurgjisë dhe me pajisje të teknologjisë së lartë, projekt i financuar nga Banka për Zhvillim e Këshillit të Europës dhe Qeveria Shqiptare.
Në mjediset e Ministrisë së Shëndetësisë dhe Mbrojtjes Sociale u firmos kontrata për fillimin e punimeve të projektit nga Ministrja e Shëndetësisë znj. Ogerta Manastirliu dhe z. Fabrizio Puccarelli, drejtor ekzekutiv i kompanisë INSO.
Nis në këtë mënyrë faza e dytë e projektit mes Qeverisë Shqiptare dhe Bankës për Zhvillim të Këshillit të Europës.
“Nisim sot një fazë shumë të rëndësishme të projektit që modernizon Qendrën Spitalore Universitare Nënë Tereza, me investimin që do të nisë të kryhet për përfundimin e ndërtimit të Kirurgjisë së Përgjithshme, shtatë sallave operatore të kompletuara sipas standarteve bashkëkohore në QSUT”, u shpreh Ministrja e Shëndetësisë dhe Mbrojtjes Sociale, znj. Ogerta Manastirliu pas firmosjes së kontratës për përfundimin e ri për Kirurgjinë e Përgjithshme në QSUT.
Shërbimet i Kirurgjisë, pjesë e strukturës ekzistuese të godinës së urgjencës, do të ketë një kapacitet me 60 shtretër me një bllok prej 7 sallash operatore dhe 14 shtretër për terapinë intensive, të cilat do të pajisjen me aparatura mjekësore moderne.
Pas përfundimit të projektit, spitali i ri i do të ketë një kapacitet prej 120 shtretër, duke bërë të mundur transferimin e shërbimeve të Kirurgjisë së Përgjithshme me 3 klinikat e tij, në këtë strukturë të re në QSUT. Vlera e investimit është mbi 7.3 milion euro, nga të cilat, rreth 4 milion euro do të investohet në pajisje mjekësore të teknologjisë së lartë.
