Kina po përgatit qendrën më të madhe të komandës së luftës, sipas Financial Times. Imazhet satelitore të shqyrtuara nga agjencitë e inteligjencës amerikane tregojnë një kantier ndërtimi që mbulon një sipërfaqe prej rreth 1500 hektarësh, 30 kilometra në jugperëndim të Pekinit, me vrima të thella që, sipas ekspertëve ushtarakë do të strehojnë ushtrinë kineze në rast të çdo konflikti, përfshirë një luftë bërthamore.
Sipas zyrtarëve aktualë dhe të mëparshëm amerikanë, qendra e komandës ushtarake që po përgatit Kina do të jetë më e madhja në botë dhe të paktën 10 herë më e madhe se Pentagoni.
Ndërtimi i projektit filloi në mesin e vitit 2024, me analistët që e quajtën atë “Qyteti Ushtarak i Pekinit”.
Siç vë në dukje Financial Times, projekti po përparon ndërsa ushtria zhvillon armë të reja përpara 100 vjetorit të themelimit të saj në 2027.
Agjencitë e inteligjencës amerikane pretendojnë se presidenti Xi Jinping ka urdhëruar gjithashtu ushtrinë e vendit të zhvillojë aftësinë për të sulmuar Tajvanin deri atëherë.
“Nëse konfirmohet, ky bunker i ri i avancuar i komandës nëntokësore sinjalizon qëllimin e Pekinit për të transformuar veten jo vetëm në një forcë konvencionale të klasit botëror, por edhe për të fituar aftësinë për luftime bërthamore”, tha ish-kreu i analizës së Kinës për CIA-n.
Nga ana e saj, ambasada kineze në Uashington mban një heshtje shurdhuese, duke u mjaftuar me komentin “nuk i dimë detajet” për të shtuar se Kina është “e përkushtuar në rrugën e zhvillimit paqësor dhe në një politikë mbrojtëse”.
Një ish-analist i imazheve në Agjencinë përkatëse të Sigurisë Kombëtare të SHBA-së, i cili ekzaminoi pamjet vlerësoi se kishte të paktën 100 vinça në një sipërfaqe prej 5 kilometrash katrorë, në zonën ku po ndërtohet projekti “faraonik”.
