Të mërkurën, Kina i dha fund mbylljes së Wuhanit, qytetit ku u shfaq për herë të parë koronavirusi dhe e ktheu atë në një simbol të fuqishëm ku humbën jetën mijëra njerëz. Pikërisht kjo vatër e Covid-19 tronditi ekonominë globale dhe solli trazina në jetën e përditshme në të gjithë planetin.
Tashmë, pas më shumë se 10 javësh i mbyllur, Kina ka vendosur hapjen e Wuhanit, një zonë ku rikthimi në normalitet do të vëzhgohet nga e gjithë bota, si një mësim për popullatat e tjera që do të përpiqen t’i rikthehen jetës normale, pas katastrofës që shkaktoi një pandemi e tillë tronditëse.
Në Wuhan, sëmundja dhe vdekja kanë prekur qindra mijëra jetë, duke shkaktuar ndërkaq edhe trauma tek pjesa tjetër e qytetarëve që mund të zgjatën me dekada. Bizneset, madje edhe ato që janë rihapur, përballen me një rrugë të vështirë përpara, duke ecur me një ngadalësi që ka gjasë të vazhdojë. Autoritetet ndërkaq vazhdojnë me politikat rregullatorë të levizjes së njerëzve, duke ngadalësuar kthimin në normalitet, edhe nga frika e rikthimit të një faze tjetër të shpërthimit të virusit.
Autoritetet kineze mbyllën Wuhanin, një qendër industriale me 11 milione njerëz, në fund të janarit, në një përpjekje të furishme për të kufizuar përhapjen e shpërthimit të koronavirusit. Në atë kohë, shumë njerëz jashtë kësaj vatre e panë atë si një hap ekstrem, një gjë që mund të provohej vetëm në një sistem autoritar si ai i Kinës. Por ndërsa epidemia u përkeqësua, dhe qeveritë në mbarë botën kanë miratuar një sërë kufizimesh të rrepta në lëvizjet e qytetarëve të tyre.
Rreth 1.4 milion infeksione dhe 80,000 vdekje janë raportuar në të gjithë botën – shifra që po rriten shpejt, ndërsa zyrtarët thonë se shumë pak e kuptojnë shtrirjen e vërtetë të pandemisë. Infeksioni është ngadalësuar në vendet e goditura si Italia dhe Spanja, por ai vazhdon të përhapet shpejt diku tjetër në të gjithë globin, përfshirë Shtetet e Bashkuara, ku numri i të prekurve po arrin në 400,000.
Raportet e lajmeve janë të mbushura me skena spitalesh të tejmbushura në New York City, trupa të pambuluar në rrugët e Ekuadorit, azhurnime për gjendjen e kryeministrit Boris Johnson të Britanisë, i cili është shtruar në spital në kujdesin intensiv, dhe paralajmërime të ekspertëve se epidemia mund të shpërthejë edhe në zonat më të varfra të botës.
Shumica e Evropës, India, shumë prej zonave në Shtetet e Bashkuara, dhe shumë vende të tjera, kanë urdhëruar mbylljen e bizneseve, ndërsa shumica e njerëzve duhet të qëndrojnë në shtëpi, duke pasuar kështu me shkatërrim të ekonomsë dhe miliona të papunë.
Shembulli i një sakrifice të politikave të kësaj natyrë, mund të merret më së miri nga Ëuhani, ku mbyllja e vendit shkaktoi mijëra vende punë të humbura, dobësim të ekonomisë, dhe biznese të falimentuara. E ndonëse u vendos rihapja e qytetit, kthimi në jetën normale ëshë ende një ëndërr e largët. /e.s/
