Ende nuk është përcaktuar se çfarë shkaktoi probleme në shëndetin e kreut të PD-së Lulzim Basha dhe të mbështetësve që morën pjesë dje në mitingun që çeli fushatën elektorale të kësaj force politike, mbajtur në bulevardin “Dëshmorët e Kombit” në Tiranë. Por vetë demokratët, e quajnë këtë një sulm nga ana e kundërshtarëve politikë, mazhorancës, duke hedhur akuza për helmim të qëllimshëm.
Edhe këshilltari i kreut të opozitës Basha, Roberto Caparrotta ka pasur shqetësime me shëndetin e për këtë arsye ka kaluar natën në spital.
“Kështu do fitoni ju duke helmuar njerëzit? Pas një nate të tmerrshme tani jemi pak më mirë”, shkruan Caparrotta në Facebook duke hedhur akuza të forta se diçka e qëllimshme ka ndodhur para kryeministrisë ku demokratët çelën fushatën për garën elektorale të 25 qershorit.
Rreth 80 persona mbërritën në orët e para të mëngjesit dhe deri pak para mesdite, në urgjencën e QSUT-së me simptoma të ngjashme, kruarje të syve, skuqje në fytyrë dhe lotim.
Sipas spitalit, gjendja e tyre është përmirësuar dhe të dëmtuarit janë larguar nëpër banesa me mjekim, ndërsa Policia e Tiranës e prokuroria kanë nisur hetimet për të zbardhur se çfarë e shkaktoi këtë situatë. Demokratët kanë mohuar që në miting të ketë pasur lëndë plasëse.
