Të pranishëm në mbledhje kanë qenë zv.kryeministri Niko Peleshi, minsitri i Brendshëm Saimir Tahiri, ai i Drejtësisë Ylli Manjani, ministrja e Mbrojtjes Mimi Kodheli, kryeprokurori Adriatik Llalla, kreu i SHISH Visho Ajazi Lika, drejtori i përgjithshëm i policisë, Haki Çako dhe zyrtarë të tjerë të.
Mbledhja ka nisur në orën 18:15. Mësohet se kanë qenë kreu i SHISH, drejtori i Policisë së Shtetit dhe ministri i Brendshëm ata që kanë raportuar përpara kreut të shtetit lidhur me situatën e kanabisit në vend.
Nuk u kanë shpëtuar debateve as përfaqësuesit e qeverisë dhe as ata të institucioneve ligjzbatuese, dhe në veçanti ka pasur replika mes ministrit të Brendshëm dhe kreut të SHISH në lidhje me shkëmbimin e informacioneve, ku Tahiri mësohet të ketë thënë se policia gjithçka e ka bërë publike, dhe jo duke ngritur akuza mbi bazë perceptimesh, por çfarë ka dhënë në publik e ka dhënë me fakte të vërteta.
Mësohet se ministri i Brendshëm ka treguar dhe njëherë hartën e kultivimit të kanabisit në vend, por dhe pikat ku policia ka ndërhyrë për asgjësimin e parcelave të mbjella.
Nuk i ka shpëtuar debatit as numri dy i qeverisë Niko Peleshi, i cili pasi e ka cilësuar si të vonuar këtë tryezë, pasi qeveria i ka dhënë rezultatet e veta pozitive, të certifikuara dhe nga KE që rekomandoi hapjen e negociatave me BE, ka deklaruar se kjo tryezë nuk i shpëtoi kthimit të diskutimit në një diskutim kafeneje dhe se “kanabizimi” është ngritur mbi bazë perceptimesh dhe jo faktesh.
Ndërkohë, në fund të mbledhjes ka qenë zv.kryeministri Niko Peleshi që ka bërë një deklaratë për mediat. Në prononcimin e tij, Peleshi ka theksuar se çështja e kanabisit dhe debatet për të duhet të bazohen tek të dhënat zyrtare dhe jo tek perceptimet që i japin karakter politik.
“Ne kishim shpresën se në këtë nivel tryeza do t’i largohej vlerësimit të përceptimeve, por nuk ka ndonjë sekret se institucionet tona nuk kanë arritur ende nivelin e duhur për të bërë vlerësime të sakta dhe jo të bazuara në perceptime”, ka thënë Peleshi.
Megjithatë, ai ka shprehur bindjen se, pas kësaj tryeze agjencitë ligjzbatuese dhe kanalet e komunikimit mes tyre do të jenë më aktive.
“Do të ngremë në një nivel tjetër luftën kundër këtij fenomeni, që nuk lindi sot e as do të mbarojë nesër. Brenda fundit të janarit do të hartohet një strategji integrale kundër kanabisit, duke mundësuar parandalimin e kultivimit dhe duke ofruar incentivë për të varfërit që shpesh kriminalizohen”, ka vijuar Peleshi.
Megjithatë, në gjykimin e tij, “kjo është një tryezë e vonuar sepse qeveria i ka dhënë rezultatet e veta”.
ma.me
