Gjykata e Lartë ka shtyrë në datën 1 prill seancën për ish kryeprokurorin e përgjithshëm Adriatik Llalla. Shkak për shtyrjen është bërë mosformimi i trupës gjykuese.
Llalla i cili depozitoi rekurs në shkallën e tretë të gjyqsorit ku kerkonte pafajësi, në muajin nëntor të vitit të kaluar, u tërhoq nga kërkesa e tij.
Në 1 prill 2025, Kolegji Penal do shqyrtojë fillimisht tërheqjen e Adriatik Llalës nga rekursi dhe në rast se nuk do pranohet, atëherë Gjykata e Lartë do shqyrtojë kërkesën për pafajësi.
Adriatik Llalla u dënua me 2 vite burg nga Gjykata e Posaçme Antikorrupsion dhe për pesë vite ai nuk ka të drejtë të ushtrojë asnjë funksion publik. Ai u shpall fajtor për fshehje dhe mosdeklarim të pasurisë.
Edhe pse në kërkim ndërkombëtar, Adriatik Llalla u shfaq në një takim të kreut të PD Sali Berisha, me emigrantët shqiptarë në Romë, më 9 shkurt 2025. Ish-kryeprokurori ishte i pranishëm mes militantëve të mbledhur në sallën ku Berisha mbajti takim politik me diasporën.
